Iruñeko Black Weekend musika jaialdiaren laugarren edizioa irailaren 10ean hasiko da

Tanika Charles kanadiarra eta Burundiko JP Bimeni izango dira aurtengo jaialdian izango direla iragarri duten abeslariak. Horiez gain beste lau talde etorriko dira Iruñera, baita hainbat DJ ere. Sarrerak jada salgai daude.

Naiz|2020/03/26
Blackweekend
Tanika Charles lehen aldiz izango da Iruñean. (NAIZ)

Iruñean ospatzen den Beltza Weekend musika beltzaren jaialdiaren laugarren edizioa irailaren 10ean hasiko da eta 12ra arte luzatuko da. Asteburu horretan zehar mundu osotik heldutako soul, R&B eta musika jamaikarreko talde eta artista onenetarikoak izango dira Nafarroako hiriburuan.

Tanika Charles kanadarra eta JP Bimeni Britainia Handian bizi den Burundiko abeslaria izango dira oholtzara igotzen lehenak. Zentral aretoan egingo dira kontzertu nagusiak, eta bi abeslari horietaz gain beste lau talde izango dira aurrerago iragarriko dituztenak. DJak ere izango dira, baita erakusketak, liburu aurkezpenak, txikientzako jarduerak eta zinema ziklo bat.

Tanika Charlesek «Kanadako soularen erregina» ezizena du. 2016an ‘Soul run’ diskoarekin egin zuen debuta. Europan zehar hainbat bira egin dituen arren, Iruñera datorren lehen aldia izango da honakoa. Bertan disko berria aurkeztuko du, ‘The Gumption’, 2019an argitaratua, eta bere abesti esanguratsuenekin batera eskainiko du.

JP Bimeni ere soulean sentitzen da eroso. Zuzeneko indartsuak ditu, eta ez da eszenatokietatik baztertu lehen diskoa kaleratu zuenetik: ‘Free me’, The Black Belts talde madrildarrarekin batera grabatutakoa. Italiako ‘La Stampa’ egunkariak «Otis Redding bezala kantatzen duen printze afrikarra» bezala definitu zuen herrialde horretatik pasatu zenean.

Bizitza korapilatsua izan zuen Bimenik. Burundiko azken errege-leinuaren ondorengoa den abeslaria 1993an Kibimbako sarraskitik bizirik atera zen. Ikasketa beka bati esker Europara etorri ahal izan zuen eta hori amaitzean Britainia Handian gelditu zen errefuxiatu estatusarekin. Dioenez, musikak salbatu egin zuen. «Ez dut etxetik, ezta aurrezkirik ere. Musika ez banu, ez dakit nola biziraungo nukeen», esan zuen behin.

Jaialdirako abonamenduak jada salgai daude 36 eurotan honako webgunean.

 

NAIZ
Loading player...


KONPROMISOA, ERANTZUKIZUNA, ZORROZTASUNA

Elene CARRETO - FOKU
Loading player...


Konfinamenduaren erronketako bat da geure buruak eta gorputzak zaintzea. Bide horretan, martxoaren 30etik aurrera, NAIZek zumba saioak eskainiko ditu egunero, astelehenetik ostiralera, Elene Carreto dantzari durangarraren eskutik.