Euskal Herria Zuzenean jaialdiak aurtengo kartelaren berri eman du ostegun honetan. Auhen, Marte Lasarte, W!zard, Radio byzance eta Maskak dira lehen izenak.

«Orotariko musika estiloak oholtzara eramanen ditugu, doinu eta adierazpen mota ezberdinak taularatuz eta sorkuntza berriei plaza bat eskainiz», iragarri dute sustatzaileek.

Egunean zehar, Arberatzeko plaza denentzat irekia egongo da eta bertan orotariko animazioak izango dira (zirko, kontzertu, haurren xokoa...). «Azken urteetan bezala, mintzaldiak, tailerrak eta mahai inguruak antolatuak izanen dira hainbat gairen inguruan. Eguneko programazioari doakionez, Cie Choari eta Queer Falafel artistak izanen ditugu», diote. 

Arratsetik goiti, bi eszenatan banatua izanen da pentzea eta bertan segituko dute kontzertuek.

Azpimarratzekoa da EHZ ez dela sold-out kulturan sartuko. «Ondorioz denentzat lekua izanen dela iragartzen dizuegu. Kapitalismoak eragindako inflazio garai honetan, gure ahalegin guziak egiten ditugu festibala denendako eskuragarria izan dadin», adierazi dute.

Makrofestibletatik haratago, hemengo (h)erritmotik eraikitzen da EHZ. Hala nabarmendu dute. «Lurra denen ondasuna den heinean, EHZk ere hala izan nahi du, herri batez osatua eta herriaren erritmoak markatua, produktu kultural merkantilizatuen erritmo frenetiko eta esponentzialetatik kanpo. Arrosatik Arberatzera, belaunaldiz belaunaldi milaka laguntzailek landatu dute EHZ, elkar trukea, auzolana eta autogestioa oinarri harturik. Lurraren (h)erritmoari esker ereinen dugu EHZ!», gaineratu dute.

Ohikoa den moduan, Ipar Euskal Herriko hainbat puntutik festibalera hurbiltzeko autobusak antolatuko dituzte.

Irisarritik Arberatzera

Irisarritik Arberatzera egin zuten jauzi iaz. «Amikuze eskualdera joan zen festibala euskal kulturaren eta herri dinamikentzat emankorrak diren lurretan haziak ereitera. Lurra bezala, EHZ aberasten da eta etengabeko kimu hazkuntzan denez, Irisarritik Arberatzera joan zen festibalaren eta herri baten erritmoak uztartzera. Kulturgintzaren kapitalizazioa eta pribatizazio nehoiz baino bortitzagoa den garaiotan, EHZ-k landuriko lurrak emankor izaten segitzen du, landatzen den herrian dinamikak bultzatzen baititu tokiko erritmora egokituz, Amikuze eskualdeko biztanleekin batera».

Aurten ere ziklo desberdinez osatu da EHZ. «Funtsean, urte anitzez loratuz joan, eta lekuz aldatu behar izan du barnebiltzen dituen antolaketa talde eta laguntzaileen belaunaldien joan-jinen erritmora. Lurrez elikatuz eta soroak irauliz eraiki da urteetan zehar, salgai izan gabe».

Ostegun honetatik aurrera hiru eguneko sarrerak 43 euroan salgai dira apirilaren 1a arte webgunean. Bigarren eta hirugarren aurresalmentekin batera eta talde gehiago iragarriz informazio eta xehetasun gehiago igorriko dituzte antolatzaileek.