Ekainaren 7an egingo da Ziburun Euskal Liburu eta Disko Azokaren seigarren edizioa. Oraingoan Aurelia Arkotxa idazleak jasoko du literaturgintzako kideen eta herritarren eskerrona.

Baltsan elkarteak eta ‘Argia’-k elkarlanean onduta maiatz osoan Azokaroa ospatu da Azokaren atariko gisa tokiko elkarte batzuekin elkar lanean euskara hutsezko sorkuntzaren inguruan.

Egitaraua:
10.00 Irekitze ekitaldia, Aurelia Arkotxari omenaldia
10.10 Zubiburu: Aurelia Arkoxa eta Rakel Pardo        
11.00 Ipuin kontaketa, Kiribil konpainia Iturri zaharrean ondotik Ziburuko 3 lehen mailako eskoletako haurren sorkuntzak
11.00 Kontzertua: Madame Birrots
11.30 Aurkezpena: ‘Kontra’, Ane Zubeldia (Susa)
12.00 Aurkezpena: ‘Maurizia, biziminaren hotsa’, Garbiñe Ubeda eta Garluk (‘Xabiroi’)
12.30 Zirriborroka bertso-marrazki saioa: Amaia Karrere, Asisko Urmeneta, Haira Aizpurua Ibargarai eta Patxi Iriart
13.00 – 15.00 Azoka hetsia
15.00 Kontzertua: Esanezin
Bertsolarien mahaiez mahai: Haira Aizpurua Ibargarai eta Patxi Iriart
15.30 Umorezko saioa: Maialen Berra
15.30 Herriko Etxeko sarreran: Rol joko partidak (Rolariak elkartea)
16.00 Aurkezpena: ‘Iparrorratza’ Celine Mounole Hiriart Urruti (EHU)
16.30 Kontzertua: Sara Zozaia
17.00 Aurkezpena: ‘Palinpsespoa’ Joxe Auxtin Arrrieta (Maiatz)
17.30 Aurkezpena: ‘Ehun zaldi trostan’ Ainhoa Urien (Elkar)
18.00 Aurkezpena: ‘Carmilla’ Sheridan Le Fanu - Itz.: Maialen Berasategi (Igela / Erein)
18.30 Kontzertua: Ekhi Lambert
19.00 Azokaren hestea

Euskaraz bagara, diote antolatzaileek. «Frantses nazioa ‘fabrikatu’ egin da menpe hartu dituen herrien mintzairak suntsituz eta bere legeak inposatuz. Hala jarraitzen du heien erabilera udaletxe (katalanera), legebiltzar (korsikera), azterketa edo auzitegietan (euskara) debekatuz. Euskararen gaia osoki politikoa da beraz: pairatzen duen larrialdia ez da halabeharrez gertatzen, gure mintzaira ezabatu nahi duten politika kolonialisten ondorio zuzenez baizik», adierazi dute.

«Berdin gertatzen da EAEn, koofizialtasun faltsuaren eremuan: euskara jakitea eskubidea da, espainola, aldiz, obligazioa. Euskararen aurkako oldarraldi judizial-politiko euskarafobo betean gaude, jadanik eskasak ditugun eskubideak are gehiago murrizteko, ustezko diskriminazioaren aurka aritzeko aitzakian. Okerrago Nafarroan euskaraz ikasteko eskubidea nafar guziei bermatua ez zaielarik... Hemen kanpoko legea da nagusi, batzuetan ahanzten baitugu lortu porroska bakanek anestesiaturik: gu hobeki asimilatzeko euskara desagerrarazi nahi dute hizkuntzak egiten gaituelako herri», jarraitu dute.

Bost gune ditu Azokak: Iturri zaharra (haurrentzako ikusgarria), karpa nagusia (azokarena), karpa txikia Herriko Etxearen parean (liburu aurkezpen eta ekitaldi kulturalak), oholtza estalia Herriko Etxearen kontra (kontzertuak) eta Herriko Etxeko lorioa (rol joko partidak).   

Denera 120 metro erakusmahai eta 43 argitaletxe edo diskoetxe eta auto ekoizle, 33 liburugintza arloan, 10 musikarenean. Iaz 40 izan ziren. 2024an egon ez ziren lau argitaletxek parte hartuko dute: Euskaltzaleen Biltzarra, Nabarralde, Talaia eta Rolariak. Musika alorrari dagokionez arloan 5 auto ekoizle edo proiektu berrik mahaia atxikiko dute: Alabena, Elkor-Karma, Esan Ezin, Madame Birrots eta Sara Zozaya. Sarrera doan.

Euskaraz ari garen bakoitzean
gure herria egin eta bizi arazten dugu;
euskaraz mintzo garen guzietan
asimilazioari erresistentzia menderakaitza altxatzen diogu;
euskaraz gure hitzak, eleak eta berbak, esaldi eta gogoetak moldatzen ditugun ber
euskaldun garela ozen bezain alai berresten dugu;
euskaraz ari garen orotan
globalizazioari ezetz, logika kontsumitzaile indibidualistari uko eta
elkartasun eta auzo lanak lehenesten ditugu.
euskaraz ari garenean
erdaren whin, tirain eta tiraniari oldartzen garen harkaitz suntsiezinak gara.
Euskaraz bagara.
Euskarazko hitzak askatzen,
esaldietan dantza arazten,
olerki eta bertsotan loratzen,
film eta antzerkietan irudiztatzen,
ipuin, nobela eta gogoetetan besarkatzen,
edota kantuetan varamelatzen
ditugunean;
euskaraz
hitz egin eta sortzen,
irakurtzen eta entzuten,
zabaltzen eta berri emaiten dugularik,
gure territorio libre bakarra libreago egiten dugu,
eta gure herria biziago,
zerbait eta norbait bagara.
Euskarak egiten gaitu herri,
euskaraz bagara.

Hauxe sustatzaileen hausnarketa eta horren ondotik Euskal Herri osoari luzatutako gonbita.