Antzerkia publiko zabalari hurbildu asmoz, BBK Aretoak urteko lehen seihileko honetako arte eszenikoen programazioan sartu du ‘Bajau’, haurrei zuzendutako ikuskizuna (3 urtetik aurrera).

«Adin goiztiarretatik antzerkiarekiko interesa piztea da, eta familia osoak elkarrekin gozatu ahal izateko kultur plana eskaintzea da helburua», adierazi du Bilboko espazioko arduradunak.

Hitzordua maiatzaren 7an da, igandean, 18.00etan, eta prezio murriztu bakarra izango da: 5 euro sarrerako (gastu gehigarririk gabe eta eserlekuek zenbakia izango dute).

Ekoizpen berria

Ponten Pie Kataluniao konpainiaren lanik berriena da ‘Bajau’. Sergi Otsek sortu zuen 2009an eta 14 urtetan, Europako eta Asiako 25 herrialde baino gehiagotara zabaldu dituzte obrak. Apustu estetikoa dute ezaugarri taldearen lanek eta taularatze originalak egiten dituzte. Haien ikuskizunentzat ez ezik, baita makroikuskizunentzat eta nazioarteko hainbat ekitalditako inaugurazio-zeremonientzat ere.

‘Bajau’ obraren kasuan, izenburua Asia hego-ekialdeko tribu nomada batetik dator. Tribu hori itsasoan bizitzera egokitu da –baita ur azpian ere aldi luzeetan– eta, hain zuzen ere, ezusteko handia izango da elementu hori beste protagonistetako bat izango dela lanean. Otsek berak sortu eta zuzendu du ‘Bajau’ (Mariona Moyarekin batera eszenografiaz eta showa sortzeaz ere arduratu da) eta protagonistak beren nortasunaren bila ari diren bi anai-arreba dira (Natalia Mendez eta Borja Nietok gorpuzten dituzte). «Gizakia likidoan eratzen bada, zergatik ez urtetan bizi?», galdera luzatuko diote ikusleari.

Elkarrekin biziko dute bitarteko horretara egokitzeko eta uretako izaki bihurtzeko fantasia, eta ur azpian aurkituko dute beren lekua. Hala, eszenografiaren elementu nagusia giza eskalan egindako akuario bat da, eta funtzioan zehar betetzen joango da. Ekintzaren zati handi bat akuarioaren barruan izango da. Horrek eszena harrigarriak sortuko ditu, zirkuaren ukituarekin, eta gozagarri egingo zaie gazteenei, seguru.

Testurik gabeko showa ‘ikusizko antzerkia’ dela dio konpainiak. Lan honekin, 2023ko Max Sarietarako bi kategoriatako finalisten artean egon zen Ponten Pie (Haur, gazte edo familientzako Ikuskizunik Onenaren izendapena barne). Kritikak «antzerki-esperientzia bizi eta poetikoa» eta «ikusizko fantasia izugarria eta bikaina» dela adierazi du.

Sarrerak salgai Kutxabanken sarean. 

Xehetasun gehiago webgunean