Delirium Tremensek esana zuen azaroan egingo zuela agertokiei agur esanez eskainiko duen azken kontzertua. Astearte honetan baieztatu du zuzenekoa Santana 27 aretoan izango dela.

Ez dira bakarrik igoko eszenara, aurrerago iragarriko duten talde gonbidatu berezi bat ondoan izango dute gau berezi horretan.

«Ekitaldi honek belaunaldi oso baten soinu-banda izan den taldeari omenaldia ehgingo dio, eta azken agurra emango zaio euskal musikaren eszenan utzitako aztarna sakonari», adierazi dute Maukako kideek.

Sarrerak asteazken honetan, maiatzak 21, egongo dira eskuragarri webgunean.

80ko hamarkadatik

1980ko hamarkadan sortua, Delirium Tremens berehala bilakatu zen euskal rockaren ikurretako bat. «Taldeak bere estilo bortitz eta zuzena, letra konprometituak eta zuzenean eskaintzen zuten energia basatia zirela medio, belaunaldi oso baten ahotsa bihurtzea lortu zuen. Bere disko klasikoak, ‘Ikusi eta Ikasi’ (1986), ’Hiru Aeroplano’ (1988) edo ’Bilbo Zuzenean’ (1991), belaunaldiz belaunaldi pasatu dira, eta gaur egun ere euskal rockaren historiako lan esanguratsuenetakoak dira», gogoratu dute.

2019an, Iñigo Muguruzaren omenaldian parte hartu zuten. 2022an agertokietara itzuliko zirela iragarri zuten BECen kontzertu batekin eta ‘Hordago’ (2022) izeneko disko berriarekin. «Harrera apoteosikoa izan zen, Delirium Tremensek imaginario kolektiboan bizirik jarraitzen zuela berretsiz. 2024ko abenduan kaleratu zuten bere azken lana, ...‘Ta Nora?’ (2024), bere desegitea 2025ean iragarriz eta garai garrantzitsua izan duen ibilbide baten amaiera gisa».

«Azken lan honek aurreko diskako ildotik jarraitzen du, baina oraingo honetan tonu nostalgikoago eta sakonago batekin. Delirium Tremensek beti izan duen indarra eta koherentzia artistikoa erakusten du, eta entzulearengan arrasto emozional sendoa uzten du. Taldearen esanetan, ‘…Ta Nora?’ galdera existentzial bat da, haien ibilbideari erreferentzia eginez, eta, era berean, belaunaldi oso bati zuzendutako mezu gisa uler daiteke», gaineratu dute.

Azken kontzertu honek musika emanaldi bat izatetik harago joan nahi du. «Hitzordu honek historia ukitzen du, belaunaldi baten sentimendu kolektibo bat. Musikaz gain, taldearen ibilbideari, garaiko testuinguru sozial eta politikoari eta Delirium Tremensek musika eta identitatearen inguruan sortutako diskurtsoari egingo zaio omenaldi», diote.