Errusiaren eta Ukrainiaren arteko gatazka armatuaren karira, Europar Batasunak lehen zigor multzo bat onartu behar izan duenean, helburuetako bat Kremlinetik datozen berrien agentziak eta prentsa eragoztea izan da. Eta jazartsuen zerrendan sartu duten pertsonetako bat Margarita Simonyan izan da, Russia Today (RT) kanalaren ingelesezko bertsioaren burua. Europar Batasunaren aburuz, kate horrek, Kremlinek omen dituen makineria mediatikoaren parte diren beste bitarteko batzuek bezala, funtsezko zeregina du propaganda errusiarra zabaltzeko eta aliatuen multzoan zatiketa eragiteko.
Horregatik, igande honetan, Ursula von der Leyen Europako Batzordeko lehendakariak, Josep Borrell Batasuneko atzerri- eta Segurtasun-Politikarako goi-mailako ordezkariarekin batera, aurrekaririk gabeko urrats bat iragarri du EBn, RT eta Sputnik emititzea debekatuko dela iragarri baitu. «Gaur pauso erabakigarria emango dugu RT eta Sputnik EBn emititzea debekatzeko. Sugeari lepoa moztuko diogu, alegia», azaldu du espainiar politikariak bere hitz egiteko tankera lotsagabeaz.
Urtarriletik, Alemanian Telegram, sare sozialetan mezuak elkar trukatzeko aritzen den errusiar plataforma, ixteari buruz hitz egin da; izan ere, mezularitza-zerbitzua ezaguna da eskuin-muturreko taldeen artean, eta Alemaniako legea urratzen duela esan zuen Nancy Faeser barne-ministroak Die Zeit astekarian:
«Ezin dugu alde batera utzi debeku hori; ixtea larria izango litzateke eta azken errekurtsoa, jakina. Lehenik, gainerako aukera guztiak agortu behar dira». Halaber, esan zuen Alemania Europako Batasuneko bazkideekin eztabaidatzen ari dela mezularitza-zerbitzurako errusiar plataforma (Telegram) nola arautu zehazteko.
Bada, Telegram ere erori egingo da...
Kremlinek, bestalde, sare sozialak kontrolatzeko ohikoa duen jarrera zentsuratzailea areagotu egin du nabarmenki.
Marshall McLuhan zenak zioenez: «Hirugarren Mundu Gerratea informazio gerrilla izango da, biztanleria zibila eta militarrak bereiziko ez dituena».
Goian esan bezala, adibideak besterik ez dira, Marshall McLuhanek esango lukeen modura, gure artean, dagoeneko, informazioan gerra eta gerrillak egon badaudela erakusteko.
Eta Pablo Gonzalez non dago?