Torre Pachecon (Murtzian, Estatu espainolean) izandako gertakari larriek, eta horren harira piztu den eztabaidak, hemen ere premiez heldu beharreko arazoak mahaigaineratu dituzte; besteak beste, gorroto delituen norainokoa eta euren eragina. Estigmatizatutako kolektiboetako pertsonen aurkako diskriminazio adierazpen muturrekoak eta larriak dira; eta zuzenean erasotako pertsonaz harago, mehatxuzko mezua igortzen diote kolektibo osoari. Beraz, pertsona eta talde askorentzat probokazio eta arrisku egoerak sor ditzakete.

Ez dira gorrotoz betetako multzo batek burututako gertaera bakanak, baizik eta prozesu konplexuago eta sakonago baten parte dira. Benetan kezkagarriena da aitortu behar dugula delitu horiek egitean adierazten diren balioak ez direla gure gizartean arrotzak edo aberranteak; aitzitik, oso partekatuak dira, eta gizarte egitura berari lotuta daude. Esatea dago, beraz, delitu horien maiztasunak balio horien indarraren barometro gisa interpreta daitezkeela.

Komunikabideek muturreko gorroto indarkeria moduak erreproduzitzen dituzte, eta, horren ondorioz, delitu horiek intolerante amorratuek egindako ekintza isolatu gisa ikusten dira. Hala ere, egunerokotasunean ere gertatzen dira eskala desberdinetan, eta biktima eta arau hausle askok elkar ezagutzen dute, bizilagunak direlako edo biktima elikadura denda txiki bateko dendaria delako, esaterako. Hau da, gizartean erabat integratuta dauden pertsonek egiten dituzte.

Azken egunetan gertatutakoa eta antzeko portaera onartezinak irmoki salatu behar dira, dudarik ez, baina ez da nahikoa. Era berean, arreta jarri behar zaie, adibidez, hitzezko jazarpen eta abusu jokabide askori, intentsitate txikiagokoak direnak, baina modu orokortuagoan gertatzen direnak eguneroko harreman eremuetan. Hauen funtsezko eragina elkarbizitzaren higaduran ukaezina da. Alde horretatik, bereziki adi egon beharko dugu udan ospatzen ari diren jaietan: errotik baztertu behar ditugu, besteak beste, jarrera arrazistak eta matxistak, benetan jaiak guztiontzat izan daitezen.