Martxoaren 26an, Londresko Cityko Magistratuen Auzitegiko epaile batek debekatu egin zuen buskinga (kaleko ekintzak) Leicester Square plaza mitikoan. Argudiatu zuen kontzertu etengabeen zarata «tortura psikologikoa» zela bizilagunentzat eta gertuko negozioentzat. Global Radiok ezarri zuen salaketa.

Irizpen horren ondorioz, Londresko Westminster barrutiko (Westminster City Council) Udalak bertan behera utzi behar izan zituen, apirilaren 17tik aurrera, Leicester Square-n jarduteko izendatutako bi eremuak. Artisten gremioak haiek kaleetatik botatzeko beste saio bat dela uste dute.

2.500 libra arteko zigorrak

Westminster City Councilek kaleko aisialdirako lizentzia-sistema bat ezarri zuen 2021eko apirilean, eta, ordutik, Londresko zentroan jarduteko baimendutako espazioa (%90) murriztu du. Gainera, hogei bat artista epaitu ditu. Horietako batzuei 2.500 libra arteko zigorrak ezarri dizkie, bai eta kargu kriminalak ere, araudia ez betetzeagatik.

Neurria jakitera eman zenean, protesta gisa, musikari talde bat bildu zen plazan kantatzeko, kaleko emanaldiak krimenak ez direla azpimarratzen zuten pankartak zeramatzatela. Westminsterreko Udalari eskatu zioten ez jarraitzeko kultura «hiltzen».

«Kalean kantatuz irabazten dut bizitza partzialki; beraz, horrek esan nahi du zailagoa izango dela niretzat nire semea elikatu ahal izatea», esan du Nick Howek. Haserre dago erabakia nola hartu den ikusita, musikariekin negoziatu gabe eta emanaldiak bertan behera uzteko irtenbide alternatiborik eskaini gabe.

«Hori egiteko beste modu batzuk daude; postuak kudea daitezke edo dezibelioen minimoak ezar daitezke zarata batzuekin arazoak badaude», azaldu du musikariak, zeinak herritarrei eskatu baitie Londresko agintariekin harremanetan jar daitezela, erabakia iraultzeko.