Paristarrak pozik daude suontziaren itzulerarekin, Jokoetan «gozatzeko denbora nahikorik» izan ez zutelako, esan du Seb Leroy egoiliarrak: «Espero dut Parisko ondare kultural eta arkitektonikoaren parte izatea».

Ekainaren 21eko gauean, kaleak jendez eta jaiez betetzen dituen Musikaren Jaiarekin bat eginez, su olinpikoaren ikuskizun batek argituko du Parisko zerua, eta, ordutik irailaren 14ra arte, su-ontzia 60 metro igoko da gauero, eguraldiak uzten badu.

Egun horretatik aurrera, globo enblematikoa bisitatu ahal izango da, doan, egunez, 10:00etatik 21:00etara. Hitzordu horrek interes handia sortu du turisten artean.

Erregairik gabeko sugar elektrikoa

2024 Jokoetako suontzi olinpikoak, 30 metroko altuera eta 7 metroko diametroa duenak, erregairik gabeko sugar elektrikoa zuen, urez eta argiz soilik osatua. Mundu osoko ikusleak eta atletak txundituta utzi zituen, irailaren erdialdean Joko Paralinpikoak amaitu zirenean erretiratu zen arte.

Adam turista australiarrak Jokoak Melbourneko bere etxetik ikusi zituen eta gogoan du «zein ikaragarria» izan zen suontziaren altxamendua. Horregatik sugarraren itzuleraren inaugurazio-ikuskizunera «zalantzarik gabe» joango litzatekeela aitortu du.

Hiriaren erdigunean kokatuta, ikur olinpikoak garrantzi berezia izan zuen Jokoetan; Parisko arkitektura bereizgarriaren artean egokitu zen, beste monumentu bat balitz bezala.

«Inguruan nenbilen, eta globoa eta Eiffel dorrea atzean ikusi nituenean, ikusgarria izan zen. Oso polita zen», aitortu du Alinak, egunotako egitura muntaia ikusteko aukera izan duen portugaldar bisitariak.

Administrazio ezberdinen artean hainbat hilabetetako negoziazioen ondoren, Macronek, Gobernuarekin eta Parisko Udalarekin batera, globoa jatorrizko lekura itzultzeko erabakia hartu zuen. Udan izango da, ekainaren 21etik irailaren 14ra bitartean, 2028ko Los Angeleseko Olinpiar Jokoak hasi arte.