Euskal Encounter informatika topaketaren 33. edizioa egingo da uztailaren 24tik 27ra, Barakaldoko BEC erakusketa gunean. Guztira, 4.000 ordenagailu eta 5.000 parte hartzaile baino gehiago bildu eta 200 jarduera inguru izango ditu.

Euskaltel Fundazioak, Eusko Jaurlaritzak (SPRI taldearen bidez), Bizkaiko Foru Aldundiak eta BBK Fundazioak babestutako ekitaldian, arduradunek iragarri dutenez, segundoko 60 gigabiteko Interneterako konexioa izango da, baita prestakuntza, entretenimendua eta networking uztartzen dituzten 200 jarduera baino gehiago ere. Gainera, Opengune eremu irekiak dozenaka hitzaldi, tailer eta erakusketa eskainiko ditu hainbat gairen inguruan: 3D inprimaketa, bideojokoak, hezkuntza teknologiak, ekimen solidarioak eta abar.

Aurten, adimen artifiziala izango da ardatz nagusia; besteak beste, programazioa, ikerketarako eta irakaskuntzarako tresna digitalak, ziberindarkeriak, bideojokoen industria eta zibersegurtasuna ere jorratuko dira.

Javier Gomez-Arrue Euskal Encounterreko antolatzaile nagusiak adierazi duenez, «topaketak komunitate berezia sortu nahi du, konbentzioetatik haratago pentsatzen duten pertsonekin, teknologia aplikatzen dutenekin, ezagutza sormenarekin lotzen dutenekin eta datuak eragin sozialarekin konektatzen dituztenekin».

Berrikuntza ekosistemaz elikatuz

«Gure helburua da parte hartzaileek informatikaren muga berriak aztertzea, lankidetza proiektuak sortzea eta berrikuntza ekosistemaz elikatzea, ez soilik bilkura honetan baizik eta baita aurrerantzean ere», azaldu du.

Euskal Encounterrek ohiko arloak landuko ditu, hala nola sormen digitala, hardwarea, software librea, bideojokoak eta aisialdirako jarduerak, eta parte hartzaileek beren talentua probatzeko aukera izango dute arte digitaleko 20 bat lehiaketatan. Gainera, 50 bideojoko lehiaketa baino gehiago eta software libreko erronka espezifikoak izango dira. Azken horietan, programazioko eta informatikako adituek proba ugari gaindituko beharko dituzte hainbat arlotan.

Streaming guneak leku nabarmena izango du edizio honetan. Edukien sortzaileentzako espazioa da, alor dinamikoenetarikoa, eta ekosistema digitalaren barruan hazkunde betean dagoen sektoreari ikusgarritasuna emango dio.