«Oreinen sakabanatze geografikoa saihesteko eta ugaltzeko aldietan edo marrualdian hautespen naturalaren alde egiteko helburu bikoitzarekin, beharrezkoa da espeziearentzat kritikoa den aldi horretan zehar ahalik eta gehien murriztea kanpotik datozen nahasmenduak naturagune babestuaren isurialde arabarrean». Saray Zárate Ekonomia Garapenaren eta Jasangarritasunaren Saileko foru diputatuaren hitzak dira.

Arabako Foru Aldundiak jakinarazi duenez, egurraren, larreen, luberritzeen edo baimendutako ikerketa zientifikoekin lotuta dauden baimendutako kasuetan izan ezik, debekatuta egongo da ibilgailuen trafikoa.

Marrualdian zehar ibiltzeko mugak dituzten pistak eta bideak behar bezala seinaleztatuta egongo dira, eta zaldi ibilbideek eta mendiko bizikletaz egindakoek ere parkeko arduradunen baimena izan beharko dute.

Era berean, debekatuta dago perretxikoak eta basafruituak biltzea aipatutako aldian marrualdi zonan, bai eta premiazkoak ez diren baso jarduerak egitea ere, hala nola sastrakak kentzea, bakanketa edo mehazketak egitea eta droneak erabiltzea.

Foru Aldundiak 5 ezkutaleku desmuntagarri eraikiko ditu profesionalentzat biodibertsitatea babesteko eta garai horretan oreinei argazkiak ateratzeak edo filmatzeak eragin ditzakeen eragozpenak ahalik eta gehien murrizteko.

Zehazki, 36.146,72 euroko inbertsioa izan da ezkutaleku horiek egitea. Ekintza hori Europar Batasunak finantzatutako NextGenerationEU Berreskuratze, Eraldaketa eta Erresilientzia Planaren barruan dago, 'Parke Naturalak' HTJPren barruan.

Egitura horiek erabiltzeak egunean 15 euroko kostua izango du, eta astean lau egunetan soilik erabili ahal izango dira. Gainera, Parke Naturalaren berariazko baimena izan beharko dute, eta han zehaztuko dira tokiei, ordutegiei eta portaera arauei buruzko betekizunak.

Lau bisita gidatu

Lau bisita gidatu programatu dira (bi euskaraz eta bi gaztelaniaz) jarduera handieneko egunetan marrualdia ikusi ahal izateko. Izena emateko epea abuztuaren 25etik irailaren 7ra izango da gorbeiaparkearen webgunean.

Marrualdi eremuaren mugaketa, iparraldean, Arabaren eta Bizkaiaren arteko banalerroa, Arraldeko Haitzak (Zuia) eta Leizaranda (Zigoitia) dermioetatik izango da. Ekialdean, Muruko herritik ‘Leizaranda’ dermioraino, Gorbeiako harrobietara doan pista eta hortik aurrera.

Hegoaldean, Murua, Manurga, Zarate, Aretxaga, Markina eta Sarria herrietako Gorbeiako behe basoa, A-3610 errepidearen eta Gasteiz-Altube N-622 autobidearen gainean dagoena. Azkenik, mendebaldean, Baia ibaiarekin paralelo doan pista, Sarria herritik ‘Arraldeko haitzak’ dermioraino.

Marrualdiari, eskaera egiteko moduari, ezkutalekuen zozketari eta jardueretan izena emateko moduari buruzko argibide guztiak eskuragarri daude Gorbeia Parke Naturalaren webgunean.