Zeelanda Berriko lehen ministro Christopher Luxonek plan bat aurkeztu du, 1987an onartutako Kontserbazio Legea erreformatzeko. Plan horren bidez, sektore turistikoa handituko duen kontzesio-sistema berri bat ezartzea espero dute, eta, aldi berean, tarifa hori ezarriko litzaieke atzerritarrei jende asko biltzen den lekuetan.

Legebiltzarrean onartu beharko den proposamen honen helburua da «enplegu gehiagori, hazkunde gehiagori eta soldata handiagoei baietz esatea».

Zeelanda Berriak 3 milioi turista atzerritar inguru jaso zituen 2024an, aurreko urtean baino %13 gehiago.

Joan den urrian, Zeelanda Berriak hirukoiztu egin zuen turisten sarrera-tasa, 64 dolarreraino, zerbitzu publikoen mantenua eta ondare nazionalaren kontserbazioa ordaintzen laguntzeko.

Sarrera berria honako leku hauetan aplikatuko litzateke: Cathedral Coveko Itsas Erreserban, Tongariroko Bidegurutze Alpinoan, Aroraki mendian (Zeelanda Berriko tontorrik garaiena) eta Milford Sound fiordoan, herrialdeko lekurik ospetsuena, munduko zortzigarren miraritzat hartzen dena.

Atzerritarrei bakarrik

Gobernuak ziurtatu duenez, leku horietan atzerritarrei bakarrik kobratuko zaie, bisitari guztien %80ri, eta zeelandaberritarrentzat doakoa izaten jarraituko du.

Bestalde, Tama Potaka Kontserbazio ministroak adierazi du ingurumen-babes handiagoa bilatzen dutela, indarrean dagoen «lege zaharkitua» zuzenduta eta kanpotarrei kobratuta, «turismo jasangarriari egiten dioten ekarpena hobetzeko».

«Turistek ekarpen handia egiten diote gure ekonomiari, eta inork ez du hori aldatzerik nahi. Baina askotan entzun dut, bisitatzen gaituzten lagun atzerritarrengandik, harrituta daudela munduko tokirik ederrenetako batzuk dohainik bisitatzeko aukera dutelako», aitortu du Potakak.

Oraingoz, Gobernuak ez du zehaztu noiz hasiko diren sarrera kobratzen, baina tokiko hedabide batzuek 2027 urtea aipatzen dute.