‘Gastehiz herritik euskararen hirira. 1.000 urte lotzen gaituen haria’ ekimena Udal Gobernuaren eta EH Bilduren aurrekontu akordioan dago jasota. Horren berri eman zuten Maria Nanclares Euskara zinegotziak, Maider Uriarte EH Bilduko zinegotziak eta Uxue Alonso GEU elkarteko koordinatzaileak.

Jakinarazi zutenez, ‘Gastehiz’ toponimoa lehen aldiz Donemiliagan agertu zenetik igaro diren 1.000 urteei egindako keinua da aurtengo leloa. Arabako herri horretako monasterioari zergak ordaintzen zizkioten 307 herrixken izena jasotzen zuen dokumentu batean agertu zen toponimoa lehen aldiz.

Jai izaera izango duen jardunaldiak bi ordu luzatu du programazioa, eta haurrei, gazteei, helduei eta famili osoari zuzendutako 14 orduko euskarazko jardueren egitaraua izango du.

GEU Elkarteak antolatutako egitaraua 11:00etan hasiko da. Goizean zehar, Andre Maria Zuriaren plazako eta Plaza Berriko programazioaren protagonistak haurrak eta familiak izango dira.

Eguerditik aurrera, programazioak Andre Maria Zuriaren plaza izango du eszenatoki nagusi eta publiko orokorragora zabalduko da. Besteak beste, kontzertu akustikoak eta drag show-ak izango dira. Gainera, eskaintza gastronomikoa ere izango da.

Nanclaresek azaldu duenez, ekimenaren helburua «euskarari eta normalizazioaren alde egunero lan egiten dutenei balioa ematea da. Horregatik, euskaraz hitz egiten dutenei, euskaraz ikasten ari direnei edo, besterik gabe, partaide sentitu eta jai giroaz gozatu nahi dutenei zuzenduta daude jarduerak».

Hiri mailako ekimena

Bestalde, Uriartek nabarmendu du Gasteiz Euskararen Hiria udalerriko agendan leku bat egitea lortu duen ekimena dela. «Hiri mailako ekimen izatera zuzenduta dagoen proiektua» dela esan du, eta urte guztian zehar euskal komunitateak egiten duen lana erdigunean jartzeko «aukera bikaina».

«Bigarren edizio honekin ekimena egonkortzea dugu helburu. Izan ere, Gasteizen euskara goraka doa, euskal kulturaren eskutik. Euskararen kontrako oldarraldiaren aurrean, euskaraz bizitzeko eskubidea aldarrikatzeko beharra agerikoa da. Eskubide linguistikoen urraketa etengabeen aurrean, euskarak, gure hizkuntzak, merezi duen tokia hartu behar du, esparru guztietan. Euskara ez baita baztertzailea, euskarak batu egiten du», azaldu du.