Kukutza gaztetxea utzaraztean izandako istiluak tarteko, bi gazte alemaniar epaitu dituzte Bilbon. Fiskalak hiru urte eta erdiko zigor eskaera egin du, edukiontzi bat irauli eta erre zutelakoan. Hala ere, akusatuen aurkako froga sendorik aurkeztu gabe amaitu da epaiketa, defentsak nabarmendu duenez.

Akusazioak bi gazteek edukiontzi bat irauli eta erre zutela esan du, hain zuzen ere gertakari horiek arratsaldeko 18.15etan eman zirela azaldu du. Defentsak, bere aldetik, ukatu egin ditu gertakariak, lehenengo edukiontziak ordubete beranduago erre zituztela arrazoituz.

Horrez gain, bi gazte alemaniarrak ez ziren gertakariak eman ziren inguruetan aurkitzen defentsak aurkeztu dituen hainbat lekukoren arabera. Gainera, ertzainen azalpenetan ohikoak izan dira euren arteko kontraesanak.

Defentsa, beraz, gustura agertu da epaiketaren amaieran, ez baitute akusatuen aurkako froga sendorik erakutsi. Epaia datozen egunetan ematea espero da.

Epaiketaren harira, kalejira egin dute gaur goizean hainbat pertsonak epaitegiraino, bi gazteei elkartasuna adierazko asmoarekin.

Epaiketa gehiago

Kukutzako istiluengatik beste zenbait epaitu izango dira, bai asteazkenean gertatutako istiluengatik (8 pertsona), bai ostiralekoengatik (20), bai gaztetxe barruan babestu ziren gazteen kontra ere (30 inguru).