Korrikaren 18. edizioari emango zaio hasiera gaur arratsaldeko 16.00etan Andoaingo Martin Ugalde kulturgunean. 2.000 kilometroko ibilbidea da aurtengoa eta hilaren 24an amaituko da Baionan.

Euskalgintzako jendea izango da Korrikaren testigua eramaten lehena. Era horretan, Kontseilua, Sortzen Ikasbatuaz, Kantuzaleen Elkartea edota ‘Bertsolari’ aldizkariko ordezkariak izango dira testiguarekin lehengo kilometroa egingo dutenak.

Pirritx, Porrotx eta Marimotots pailazoek emango diote segida euskararen aldeko aldarriari, hamaika egunez eta 24 orduz Euskal Herria hartuko duen aldarri horri.

‘Eman euskara elkarri’ da aurtengo edizioaren leloa eta euskara ikasten ari diren ikasleak omenduko dituzte.

Korrika 18ren jarraipena egingo dugu NAIZen, albisteak, erreportajeak, eguneko argazkiak... barnebilduko dituen webgune berezi baten bidez.