Naiz.info
Galdakao

Xabier Lopez Peñaren heriotza salatu dute Galdakaon

Ehunka lagun bildu dira Galdakaon Xabier Lopez Peña presoaren heriotza salatzeko. «Oinarrizko eskubideen ‘Guantanamorik’» ez dutela onartuko ohartarazi dute eta mobilizazioak deitu dituzte ostegunerako eta ostiralerako Bilbon, Basaurin eta Galdakaon.

Lopez Peñaren heriotzaren harira, Galdakaon egindako manifestazioa. (ARGAZKI PRESS)
Lopez Peñaren heriotzaren harira, Galdakaon egindako manifestazioa. (ARGAZKI PRESS)

Galdakaoko kaleak zeharkatu dituen manifestazioa deitu du gaur arratsaldean Herrirak Xabier Lopez Peñaren heriotza salatu eta presoen eskubideak errespeta ditzatela eskatzeko.

Ehunka lagun bildu dira herrikidearen heriotzaren harira, horien artean, Periko Solabarria, Tasio Erkizia edo Nico Moreno.

Manifestazioaren amaieran ekitaldia burutu dute eta sakabanaketa eta egungo espetxe politika arbuiatu dituzte. «Ez dugu oinarrizko eskubideen ‘Guantanamorik’ onartuko», adierazi dute.

Herri mugimenduak mobilizazioak deitu ditu ostegunean Estatu frantsesak Bilbon duen kontsulatuaren aurrean eta ostiralean Basauriko eta Galdakaoko udaletxeen aurrean.