NAIZ.INFO
BAIONA

Ura erreketatik atera da Armendaritze, Irisarri, Hazparne eta Ahurti inguruetan

Eguerdiko ordubata arte alerta laranja dago uholde arriskua dela-eta, atzo Prefeturak eman zuenaren arabera. Azken orduotan euri jasa handienak gauaren bigarren partean eta goizean izan dira. Ondorioz, ura atera da Armendaritzen, Irisarrin, Hazparnen, Mehainen, Heletan eta Ahurtin.

Lekuinen Arhan ibaiak gainezka egin du. (Gaizka IROZ)
Lekuinen Arhan ibaiak gainezka egin du. (Gaizka IROZ)

Kazeta.info webguneak berri eman duenez, Armendaritzen ura etxeetara sartzen ari da.

Ahurtin eta Irisarrin ere zenbait etxeetara sartu da.

Suhiltzaileak lanean ari dira Irisarri, Ahurti eta Hazparnen. Azken herri honetan Arhan (La Joyeuse) ibaia atera egin da Hazketa auzo aldean. Arazoak ere badira Mehaine eta Heletako bideetan, suhiltzaileak lanean ari dira.

Iholdiko errekak ere zaintzen ari dira, Euskal Irratiek ezagutzera eman dutenaren arabera.