Euskal Iheslari Politikoen Kolektiboak ohar bidez salatu du Jon Iurrebasoren atxiloketa. Batetik, egungo testuinguruan onartezina dela diote; eta bestetik, bere osasun egoera kontuan harturik atxiloketak kalte larria eragin ahal diola. Iurrebasok eritasun larri bat dauka eta medikuen zaintzapean bizi da.
Kolektiboak gogoratu du agerian bizi dela Iurrebaso Lapurdin eta bertako gizarte bizitzan erroturik dagoela. Jokin Aranalderen egoera ere gogoratu dute, Parisko epaitegi batek bere aurkako euroagindua onartu ostean ezkutuan bizi da Aranalde.
Egoera horren aurrean akordioak lehenetsi behar direla dio Kolektiboak eta arazo politikoari «konponbide demokratiko eta justu bat» emateko deia egin du. Euskal jendarteari ere zuzendu zaio iheslarien kolektiboa, «babesa eta laguntza» eskatu dituzte «jazarpenari amaiera emateko».
Iheslariek konponbide prozesuan parte hartzeko eskubidea dutela berretsi dute oharrean eta «urratsak emateko prest» daudela. Ekainean Biarritzen plazaratu zuten konponbide proposamenari eusteko prest daudela ere adierazi dute.