NAIZ
DONOSTIA

Ander Izagirreri Europako Kazetaritza saria eman diote

Ander Izagirre kazetari eta GAUR8ko kolaboratzaileari European Press Prize saria eman diote, Kolonbiako talde paramilitarrei buruzko erreportaje batengatik.

Ander Izagirre kazetaria. (Marisol RAMIREZ/ARGAZKI PRESS)
Ander Izagirre kazetaria. (Marisol RAMIREZ/ARGAZKI PRESS)

Ander Izagirrek jaso du European Press Prize saria, ikerketa kazetaritzari dagokiona. Kazetari donostiarra ‘How to produce dead guerrillas - Así se fabrican guerrilleros muertos’ lanagatik saritu dute; Kolonbiako talde paramilitarrei buruzko erreportajea da eta ‘El Pais’ egunkarian argitaratu zuen gaztelaniaz, iazko martxoan. Euskaraz GAUR8 astekarian argitaratu zen, urrian.

 

Epaimahaiaren aburuz, istorio «ausarta» eta «ikaragarria» da Izagirrek deskribatzen duena: Kolonbiako Armadako soldaduek mutil gazteak, zibilak, bahitu eta hil egiten zituzten, eta ondoren gerrilleroen arropak janzten zizkieten, haien gorpuengatik Alvaro Uriberen Gobernuaren ordainsaria jasotzeko.

Izagirrek hainbat hedabidetan publikatu ditu bere artikuluak eta GAUR8ko kolaboratzailea da.