Enplegu Ministerioaren arabera, martxoak 1.596 langabe gutxiago utzi ditu Hego Euskal Herrian.
Jaitsierarik nabarmenena Araban jazo da, 1.160 pertsona gutxiago zeudelako enplegu bulegoetan izena emanda (%4,40ko jaitsiera). Iazko datuekin alderatuta, 2.712 langabe gutxiago daude Araban, hau da, %9,71 gutxiago.
Nafarroan, 977 lagunek aurkitu zuten lana martxoan, langabezia erregistratuaren tasa %2,17 jaitsiaraziz. 2015eko hilabete berean baino 4.308 langabe gutxiago daude Nafarroan (%8,90 gutxiago).
Gipuzkoan, %0,48 egin du behera langabezia erregistratuaren tasak, 200 pertsonek aurkitu baitzuten lana martxoan. Iazko datuekin alderatuta, 5.708 langabe gutxiago daude (%10,48).
Hego Euskal Herrian, Bizkaian bakarrik egin du gora langabezia erregistratuak martxoan, 741 pertsona gehiago baitzeuden hilabete bukaeran enplegu bulegoetan izena emanda, hau da, %0,86ko igoera. 2015ko hilabete berarekin konparatuta, %10,02 egin du behera tasak (9.679 langabe gutxiago).
Orotara, martxoaren bukaeran 198.055 pertsona zeuden Hego Euskal Herriko enplegu bulegoetan izena emanda.
Estatu mailan, aurreko hilabeteko datuekiko, %1,4 egin zuen behera langabezia erregistratuak martxoan, hau da, 58.216 langabe gutxiago.