Hiru puntuak baino zerbait gehiago lortu ditu Alavesek Valladoliden kontra Mendizorrotzan irabazitako partidan. Liga bukaera honetan gero eta zailagoa da garaipenak lortzea eta gasteiztarrek, ondo landuta eta sufrituta, baina lortu dute.

Bi taldeak ondo kokatu dira zelaian eta zaila izan da aukerak sortzea. Alaves aurreratu da Manu Barreiroren gol batekin bigarren zatian, baina hurrengo jokaldian berdinketa lortu du Valladolidek. Emaitza ez zela aldatuko ematen zuen, baina 85. minutuan Sergio Llamasek garaipenaren gola egin du.

Bost jardunaldi falta direnean, Alavesek bigarren postuan jarraitzen du eta Lehen Mailara zuzenean igotzeko lehia estuan ari da hurrengo jardunaldian aurkari izango duen Tarragonako Nastic taldearekin.