Lakuak eta Nafar Gobernuak protokolo bat izenpetu dute gaur goizean, zeinekin hainbat alorretan lankidetzarako oinarriak finkatzea duen helburu. Hala nola, polizia-alorrean eta larrialdien, babes zibilaren, trafikoaren eta bide segurtasunaren artatze nahiz koordinazioan. Protokoloaren azken helburua segurtasun-arloko zerbitzu publikoa «hobetzea eta perfekzionatzea» da, «zerbitzuen eraginkortasuna eta efizientzia handituz».

Azaldu dutenez, Poliziari dagokionez, Foruzaingoak eta Ertzaintzak «beharrezkoa den elkarrekiko aholkularitza sustatuko dute» balorazio estrategikoak trukatuz eta jarduera-esparruetan beharrezkotzat jotzen dituzten laguntzarekin. Zentzu horretan, «informazioa trukatzea, polizia-prozedurak eta operazioak, antolatutako sare kriminalen aurkako prebentzioa eta borroka, terrorismoa, delinkuentzia arrunta edo genero-indarkeria», zerrendatu dituzte.

Trafikoan ere izango du ere eragina. Modu honetan, elurte edo eurite handiekin zirkulazioa etetean bete beharreko jarduerak ere jasotzen dira.

Azkenik, beste esparru batzuk ere sartzen dira, adibidez: dokumentazio espezializatua, irakasle eta espezialistak trukatzea, ekipamendu polizialak eta teknologia berriak, polizia zientifikoa edo ingurumen-arloko delituak.