Ohar baten bidez, talde oriotarrak azaldu du zuzendaritzak eta Joxean Olaskoagak denboraldiaren balorazioa egiteko bildu direla eta, gaineratu dutenez, bertan bi aldeek adostu dute ‘Aizperrok’ ez duela entrenatzaile lanetan jarraituko.

«Aurreko postuetatik gertuago ibiltzea espero genuen eta emaitzak ez dira onak izan», adierazi du taldeak.

Olaskoagak arraunlari gazteekin eginiko lana «egoki» baloratu du taldeak, baina aurrerantzean «salto bat eman nahiko» luketela nabarmendu du.

Eginiko lana eta izandako jarreragatik esker ona adierazi dio Orio Arraunketa Elkarteak ‘Aizperrori’.

Datorren denboraldia prestatzen ari da Orio eta «epe laburrean» hartutako erabakien berri emango duela aurreratu du.