«Guk badakigu taldean batzeak ematen duena. Oso ondo ezagutzen dugu guztion eskuak batuz lortzen den indarra. Eta jakin badakigu guztion indar horiek batuz eta boga eginez baino ezin garela iritsi amesten dugun helmuga guztietara». Hala dio Oiartzualdeko arraun taldeetako hainbat arraunlarik idatzitako testuak.
Hibaikako Eli Pescador eta Alex Orena; San Juaneko Aitor Ugarte eta Irati Salazar; San Pedroko Josu Beristain; eta Trintxerpeko Xabi Goienetxea eta Xobane Uribarrena bildu dira gaur arratsaldean Pasai Donibanen, Demoarsoren eta Gure Esku Dagoren ekimenari babesa adierazteko.
Datorren martxoaren 19an hitzordu garrantzitsua dute Oiartzualdean: etorkizunerako nahi duten herri proiektuaren inguruko galdeketa. Eta bide horretan, mugarri handi bat jarri nahi dute azaroaren 6an, Pasaiako badia eskuz esku inguratuz, erabakitze eskubidearen aldeko giza kate anitz eta infinitu batekin. «Gurekin boga egiteko deia luzatzen dizuegu hemendik, Euskal Herritik Europara, Atlantikora eta mundura zabaltzen den ate honetatik. Azaroaren 6an, beraz, lotu zuen eskuak eta irabazi etorkizuna».