Igandeko partida amaitzea lortu bazuen ere, Erik Jakak Zarautzen egindako lesioa larri xamarra da eta asteartean egindako ekografian ikusi ahal denez, Lizartzako aurrelariak zuntz haustura bat du eskuin bikian eta hiru edo lau aste eman beharko ditu kantxetatik kanpo.

Gauzak horrela, Caixabank Mastersean Peio Etxeberriak beteko du Jakaren lekua Jon Ander Albisuren aurrelari gisa Lizartzakoak min hartuta jarraitzen duen bitartean. Lehen partida igandean jokatuko du Zenotzekoak, Elgoibarren, Altuna-Imazen aurka.

Bere txarrean, gauzak ondo joanda, Erik Jakak ez luke arazorik izan behar urrian Binakako txapelketa nagusiko finalerdietako ligaxkako partidak jokatzeko, baina lesioa oso une txarrean etorri zaio, geldialdiaren ondoren berreskuratutako erritmoan berriz ere atzera egitea ekarriko dio eta zuntz haustura honek.