Arabako Foru Aldundiak Agure-Arkaiate etxebizitza komunitarioaren egoera kritikoari buruzko informazioa ezkutatu duela salatu du EH Bilduk.

«Joan den asteazkenean, Politika Orokorreko osoko bilkura egin eta 24 ordura, EH Bilduri horren berri eman zioten, eta hainbat iturritatik informazioa biltzen saiatu da egunotan. Hala ere, zenbait komunikabidek informazioa biltzeko egoitzara deitu eta ordu batzuetara eman zuen Aldundiak gertaera horren berri», nabarmendu du.

Claudia Venceslao batzarkideak jakitera eman duenez, pasa den ostiralean, irailaren 25ean, lehen positiboak ezagutu ziren Agure-Arkaiaten. Egun batzuk geroago, hilaren 28an, 14 erabiltzailetik 12k eman zuten positibo PCR proban eta 12 pertsona horietatik bi ospitalean daude. Asteartean, hilaren 29an, 10 pertsona horiek Zadorra erreferentziazko zentrora eraman zituzten: bost goizean eta bost arratsaldean.

«Egun horretan, Aldundiak, informazio hori izanda, ez zuen ezer jakinarazi, eta familiek gerentearengatik jakin zuten lekualdaketaren berri», adierazi du, eta azpimarratu duenez, «hori gutxi balitz, EH Bilduk jakin ahal izan du langile gehienek positibo eman dutela eta konfinatuta daudela».

«Gure adinekoen arretan gardentasuna eskatzen dugu. Gizatasunagatik eta enpatiagatik ezin ditugu familiak senideen zaintzatik kanpoko agente gisa tratatu: adinekoak ez dira subjektu pasibo bat. Benetako informazioa eskatzen diogu Aldundiko Gizarte politiketako diputatuari: gure adinekoentzako gizatasuna eta familientzako errespetua behar da», ohartarazi du.