Asparrenako Udalak aurrera egin du Ajuria fabrika zaharraren inguruko paisaia berreskuratzeko lanetan, eta zuntz-zementuaren hondakin guztiak kendu ditu. Aurreko fasean zero kotan zeuden hondakin arriskutsu guztiak kendu baziren, orain material hori teilatutik kendu da. Guztira, bigarren fase honetan, 101.270 euro inbertitu dira eta 130 tona fibrozementu kendu dira.

Ohar batean azaldu duenez, jarduera hori Udalak abian jarritako Paisaiaren Ekintza Planaren barruan sartzen da. «Plan horren helburua da balioan jartzea industria-aurriak balio arkitektoniko eta historiko handia dutelako eta eremu naturalean kokatua daudelako. Izan ere, Aitzkorri-Aratz parke naturalera joaten diren mendizaleentzako erreferentzia eta abiapuntu da fabrika zaharra», adierazi du.

2016ko urrian, Asparrenako Udalak lurzoruaren kalitatearen esplorazio-ikerketa eta Ajuria y Urigoitia enpresaren instalazio zaharren industria-aurriaren azterketa kontratatu zituen. Azterlan horretan, kutsagarriak edo arriskutsuak izan zitezkeen hondakinak eta egiturak identifikatu ziren.

«Jarduera horiek guztiak ezinbestekoak dira lurzoruaren kalitatearen adierazpena lortzeko, kokalekuari erabilera berri bat eman ahal izateko, eremuaren garapen iraunkorrarekin eta gizarte eta kultura-garapenarekin bat etorriz», gaineratu du Udalak.

Eta hurrengo urratsa ikaztegi zaharretako eraikinen fibrozementua kentzea izango dela iragarri du.