Lakuako Gobernuak eta Korsikakoak elkarlanerako memorandum bat sinatu dute astearte honetan, besteak beste, Europar Batasuneko gobernantza eta erabaki prozesuetan bi exekutiboak gehiago aintzat hartu ditzaten aldarrikatzeko.

Iñigo Urkullu lehendakariak eta Gilles Simeoni Korsikako presidenteak lankidetza instituzionalaren memorandum birtuala sinatu dute, eta, besteak beste, Flandria, Bavaria, Quebec eta Jiangsurekin EAEk duen harreman estrategikoen sarean sartu dute Korsika.

Hitzarmenaren bitartez, bete egin da EAE eta Korsikako gobernuen arteko konpromisoa, harremanetarako bide formal eta egonkor bat ezartzekoa, alegia; izan ere, bi lurraldeek lotura estuak eta nortasun kultural sendoa dituztela nabarmendu dute.

Memorandumean interes komuneko eta lehentasunezko lankidetzako hiru eremu finkatu dira, horien artean euskara eta korsikera normalizatzeko eta sustatzeko politikak, bereziki hizkuntzen ezagutza, biziberritzea eta erabilera bultzatzeko.

Alde horretatik, Urkullu lehendakariak adierazi du pozik dagoela Estatu frantseseko Batzar Nazionalak korsikeraren eta euskararen alde hartu berri duen erabakiarekin, eta «urrats historikotzat» jo du erabakia. Izan ere, bere ustez, «inflexio-puntu bat da erabaki hori, gure hizkuntza, hezkuntza, nortasuna eta kultura biziberritzeko, Europak bere aniztasuna aktibotzat hartzen du eta».

Atzerrian bizi diren kolektibitateekiko harremanetan ere lan egingo dute, bai eta Europako gaien esparruan lankidetzan ere, EBko gobernantza- eta erabaki-prozesuetan euskal erakundeak eta korsikarrak gehiago aintzat hartzea aldarrikatzeko.

Urkulluk bi eskualdeetako eragile, erakunde ekonomiko, sozial, hezitzaile eta kulturalak gonbidatu ditu gaur ireki den elkarlan instituzional berri honetan parte hartzera. Izan ere, bost urteko indarraldia izango du akordioak.

«Memorandum honek gure herrien ongizatea hobetuko duen bide bat irekitzen du, partekatzen dugun Europa berri baterako proiektuaren esparruan», esan du Urkulluk.