Baionako Estitxu Robles kolegioko gurasoak jo eta ke lanean ari dira eraikin berriak atondu ahal izateko, baina dirua falta zaie, Pirinio Atlantikoetako Departamenduak berritze lanak ordaintzen baititu, baina ez ordea, ezinbesteko materialen gastuak. Ondorioz, gurasoek ‘Arbelak’ diru bilketa kanpaina abiarazi dute eraikin berrietako gelak ekipatu ahal izateko.

Estitxu Robles ikastetxeko gurasoei denetariko lanak egitea suertatu zaie; egun batean eraikin bateko aulki eta mahaiak ikastetxetik kanpo den beste eraikin batera eramateko biltzen dira, beste batean garbiketa lanak egin behar dituzte, eta beste egun batean konponketa lanak egiteko biltzen dira, eta horrela, «eskuak zikindu» beharrean dira eguna etorri eta eguna joan, baina horrekin nahikoa ez eta dirua biltzeko lur eta zeru mugitu beharrean dira, 85.000 euro behar baitituzte eraikin berria hornitzeko.

Diru hori eskuratzeko ‘Arbelak’ kanpaina antolatu dute gurasoek eta dirua eskuratzeko hiru lan eremu zehaztu dituzte. Lehena, herriko etxeak, 25 herritan bizi diren ikasleak baitituzte; bigarrena Baiona inguruko enpresa handiak, eta hirugarrena, norbanakoak. Batez ere, azken hauei zuzendua da ‘Arbelak’ kanpaina. Gauzak honela, lehen bi multzoekin 70.000 euro lortzeko helburua ezarri dute eta norbanakoei zuzendutako kanpainarekin, ostera, 15.000 euro lortu behar dituzte uztailaren 5a baino lehen.

Jean Marc Irigaray gurasoak aditzera eman duenez, «Herri Urratseko ‘Boga’ kanpaina pasa berria da, eta urte zaila izan da, beraz ez da erraza jendeak dirua ematea, baina helburu lorgarria dela uste dugu». Irigaray bezala, ‘Arbelak’ egitasmoaren berri emateko prentsaurrekoa eskaini duten Txomin Duhalde eta Aretz Iguiniz ere ikastolako ikasleak izan ziren eta berrikuntza lanen beharra azpimarratu dute. «Nire alaba ni izan nintzen gela berdinean izango da», gogoetatu du Iguinizek, guraso eta errugbilari ezagunak.

«Idatz dezagun ipuin eder bat»

Duela bost urte ireki zuten kolegioak hiru eraikin ditu, eta eraikin horietako bi dira berrikuntza lanetan direnak, 55 urte baino gehiago baitituzte. Baiona inguruan den euskara hutsezko kolegio bakarra izaki inguruko hamar ikastoletatik datozen ikasleak hartzen ditu, baina baita urrun diren herrietakoak ere. Esate baterako badira Landetako Akize hirian edo Peirahoradan bizi diren ikasleak.
 
2017an kolegioa ireki zutenean 67 ikasle zituen Estitxu Robles Kolegioak, gaur egun 169 ikasle ditu eta sei urteren buruan ikasle kopurua bikoitza izango dela aurreikusten dute. «Etorkizunerako kanpaina bat da», ohartarazi dute gurasoek.

‘Arbelak’ izena ezarri zioten kanpainari ikasgelak atontzeko behar duten materiala irudikatzeko asmoarekin, baina 15.000 euroak batez ere kantina eta eta haurrentzako txokoa eraikitzeko behar dituztela azaldu dute. Horregatik du presa dirua biltzeak, irailean hasiko den ikasturte berrirako lanak amaituak izan daitezen.

Kanpainaren berri eman eta lagundu nahi duen jendeari eskaintza desberdinak helarazteko baionakolegioa.eus izeneko webgunea sortu dute eta horrez gain, «helloasso» plataformaren bidez ere kanpainarekin bat egin daiteke. «Nahiz eta bakoitzak gutxi eman, pixkanaka helburua lor daiteke», nabarmendu du Txomin Duhalde gurasoak.

«Ez da soilik dirua eskatzen dugula, egunero badugu lana egiteko», nabarmendu dute Estitxu Robles kolegioko gurasoek, eta kanpainan parte hartzeko deia luzatu dute, kanpainako lema nagusiak dioen moduan, guztion artean «idatz dezagun ipuin eder bat».