Zeelanda Berriko Alderdi Maoriak herrialdearen izena ofizialki Aotearoagatik aldatzea eta herrialde ozeanikoko toki guztiei jatorrizko izen indigenekin deitzea eskatzeko kanpaina abiatu du astearte honetan.

«Bada garaia Te Reo Māori hizkuntzak berriz ere merezi duen lekua har dezan. Herrialde polinesiarra gara, eta Aotearoa gara», esan du Zeelanda Berriko Alderdi Maoriak, herrialde honetako Parlamentura bidaliko duten eskaera sinatzean.

Aotearoa, Zeelanda Berriaren izen maoriarraren etimologia ezagutzen ez den arren, jatorriari buruzko zenbait teoria daude, polinesiar migrazio handiaren kanoetako bati buruzkoa edo bidaiariak gidatzen zituen «hodei zuri luzea» mitologikoa kasu.

XIX. mendean, britainiar kolonizazioarekin, Zeelanda Berria izena hartu zuen. Abel Tasman esploratzaile holandarrak eman zion deitura, Zeeland izeneko Herbehereetako probintzia bati erreferentzia eginez.

Maori Alderdiaren eskaera bat dator Jacinda Ardern laboristaren Gobernuak jatorrizko herrien kultura aitortzeko une batekin. Ardernek hainbatetan egin du, agerraldi ofizialetan eta zeremonia batzuetan ere parte hartu du. Hala nola, urte hasieran jai nazionala izendatu zuen Maori Urte Berria (Mataraki), «zeelandarren nortasun partekatua aitortzeko».

Iazko hauteskunde kanpainan, lehen ministroak esan zuen ez zuela Zeelanda Berria izena aldatzeko asmoa aztertu, baina jendea Aotearoa deitura erabiltzera animatu zuen. «Lurralde honetako herria (Tangata whenua) kokoteraino dago gure antzinako izenak baztertuta ikusteaz. XXI. mendean gaude, eta horrek aldatu egin behar du», azpimarratu du Alderdi Maoriak sare sozialetan egindako kanpainan.

Duela gutxiko datuen arabera, 5 milioi biztanle baino gehiago dituen Zeelanda Berriko maoriek biztanleriaren %20a osatzen dute eta %3ak erabiltzen du Te Reo Māori hizkuntza.