Ostegun honetan hustu egin du Ertzaintzak Gasteizko Zentro Sozialista, eta oldartu egin zaie operazioa salatzeko mobilizatu diren gazteei.
Protestak goiz hasi dira, 9.00ak aldera, hiriko erdigunean, Dato kalean dagoen Laboral Kutxaren egoitzan. Bertan gazte bat kateatu da, enpresa horren jarrera salatzeko. Izan ere, Laboral Kutxa da pasa den urtean Kontseilu Sozialistak okupatu zuen lokalaren jabea.
Jendetza bildu da kateatu den gazteari elkartasuna adierazteko, eta Ertzaintzaren kolpeak jasan dituzte. Bederatzi gazte identifikatu dituzte agenteek eta bat, kateatu egin dena, atxilo hartu dute.
Ondoren Ertzaintzak Monseñor Estenaga kalea itxi du, kale horretan dagoen Zentro Sozialista husteko. Orduak igaro dira sartu diren arte.
Calles cortadas en la zona de Jesús Obrero, dónde está previsto el desalojo de Gasteizko Zentro Sozialista pic.twitter.com/u6cMJEReXS
— Ion Salgado (@Ion_Salgado) January 13, 2022
Bitartean dozenaka gazte hurbildu dira bertara kaleratzea salatzeko, eta tentsio uneak errepikatu dira. Ertzaintzak berriro jo du haien aurka, eta hainbat gazte zauritu ditu.
Carga de la Ertzaintza contra los jóvenes en Gasteiz pic.twitter.com/LHHoLR6qVt
— Ion Salgado (@Ion_Salgado) January 13, 2022
«Identifikatuak, zaurituak eta atxilotu bat utzi digu gaurko egunak. Horregatik eta espazioaren defentsa egiteko gaur 18.30etan Andra Mari Zurian», adierazi du Kontseilu Sozialistak sare sozialen bidez zabaldutako mezu batean.
Ertzainek kargetan zauritutako pertsonen irudi gehiago.
— Gedar.eus (@GedarLangileKZ) January 13, 2022
Ospitalera joan dira gero ertzainak, eta zaurituak identifikatu dituzte. pic.twitter.com/f7ay5GYA4C
Hamarnaka pertsona batu dira arratsaldeko elkarretaratzean «Zentro sozialistak defendatu» lemapean. «Antolakuntza komunista», «Gogor eta tinko espazioen defentsan» eta «espaziorik gabe, antolatzerik ez» leloak ohiukatu dituzte.
«Burgesiak demostratu du bere eskura dituen baliabide guztiak erabiliko dituela langileriak espazioen gaineko kontrola ezarri ez dezan. Baina ziur gaude indar metaketa eta antolakuntza efektiboa direla garaipenaren gakoak», aiderazi du bozeramaileetako batek.