Gurpil-aulkian mozorrotuta zegoen gizon batek, ileorde batekin jantzita, tarta bat jaurtita eraso egin zion igandean Leonardo Da Vinciren ‘Gioconda’ margoari, Parisen. Koadroak, balen aurkako kristal batez babestuta, ez du kalterik izan.

Louvre Museoak uko egin dio erasoari buruz hitz egiteari. Louvreko iturriek adierazi dutenez, museoaren zuzendaritzak ez du erabakirik hartu erasoaren ondoren, ezta erasotzailearen aurka hasi beharreko ekintza legalen inguruan ere eta zuzendaritzak gertakaria egunean zehar aztertuko duela adierazi du.

Bisitariek sare sozialetan argitaratutako zenbait bideotan pertsona bat gurpil-aulkian ikusten da, ileorde eta txanoarekin, eta segurtasun langileek aretoaren kanpoaldera eramaten dute. Gizonak, bitartean, oihu egiten zuen: «Pentsatu Lurrean. Planeta suntsitzen ari den jendea dago. Horregatik egin dut hau».

Gizonak tarta jaurtitzen duen momentuko irudirik ez dagoen arren, erabiltzaileen argazkiek Louvreko langileak tartaren hondarrak jasotzen eta kristala garbitzen ikustea ahalbidetzen dute.

Can anybody translate what ole dude was saying as they where escorting him out?😂 pic.twitter.com/Uy2taZ4ZMm

— Lukeee🧃 (@lukeXC2002) May 29, 2022

«Hau erokeria da niretzat, baina adineko emakume batez mozorrotutako gizon batek gurpil-aulki batetik salto egin du eta Mona Lisaren balen kontrako kristala hausten saiatu da. Gero, kristala tartaz zikindu eta arrosak bota ditu nonahi, segurtasunak heldu baino lehen», adierazi du Twitterren @lukeXC2002 erabiltzaileak.

Artelana beste eraso batzuen biktima izan da lehenago ere. 2009an gizon batek katilu bat jaurti zion, eta 1974an Japoniari utzi ziotenean emakume bat esprai gorriz txikitzen saiatu zen. Kristala, hain zuzen ere, obraren aurkako erasoak saihesteko jarri zen. 1957an, Boliviako bisitari batek harri bat bota zion: «Harri bat neukan poltsikoan, eta bat-batean ideia etorri zitzaidan burura», esan zuen gizonak ‘Le Monde’ egunkarian.