BASE jauzia, paralpinismoa, wingsuit-a… gero eta gehiago hartzen ari dira mendiguneak. Mendizaleak eta eskalatzaileak ere harrapatu ditu, eta jarduera batean edo bestean kirolari horiek hegan egiten ikusten ditugu. Ez da gaurko kontu bat, baina, bederen, azkenaldiotan batzuek-batzuek jarduera ikusgarriak egin dituzte. Hurrengo hiru adibideetan, wingsuit-a (hegal-trajea) da kirolariek jauzi egiteko erabili duten tresneria.

Aconcagua

Urte Berriari hasiera emateko, Tim Howell-ek hegal-jantzi batekin hegan egin zuen Aconcaguan. Hori egiten, lehen kirolaria izan da. Aurreratu behar dugu mendi horren gailurra (6.962 m) ez zuela zapaldu eta jauzi hori 6.000 metrotik egin zuela: «Eguraldi makurrarengatik atzera egin nuen. Baina jaisten ari nintzela, hegan egiteko aukera on bat aprobetxatzeko aukera izan nuen. Ez zen batere samurra izan, baina den-dena ondo irten zen. Hegal-traje batekin egin dudan lorpen handiena izan da».

Eskalatzailea zein alpinista da britainiarra, baina BASE jauzian eskarmentu oso aberatsa du. Denera, azken hamar urteotan ehun jauzi egin ditu Alpeetan, Yosemiten, Groenlandian…

Jarduera hori egin eta gero, Howell-ek adierazi zuen oso emozionatuta zegoela: «Esan behar dut adrenalina konturik ez dagoela; izan ere, jauzi egin aurretik oso lasai egon behar dut. Kirol hau oso arriskutsua da, baina azken urteotan aurrerapen teknologiko garrantzitsuak izan dira».

Dolomitak

Bien bitartean, Marco Milanesek free solo eta wingsuit-a elkar lotu ditu. Hots, bakarka integraleko eskalada eta hegal-trajea. Lehenik eta behin, eskalatzaile italiarrak Vajolet izeneko orratza (Dolomitak) sokarik gabe igo zuen. Horretarako, “Piaz” bidea aukeratu zuen: 140 metro eta, gehienez, IV+ zailtasun teknikoak. Eskalada hori bukatu bezain laster, hegal-trajea jarri eta jauzi egin zuen: «Bi kirol horiek uztartzen ditut gizabanako bezala nire estetika eta perfekzioa lortzeko. Sokarik gabe eskalatzea biziki gustatzen zait; oso soila da eta nire beldurrei aurre egiten diet».

Mont Blanc

Fred Fugen, Vincent Cotte eta Aurelian Chatard, berriz, ez dira eskalatzaileak ezta alpinistak ere. Alabaina, BASE jauzian munduko espezialista zailduenetarikoak diren kirolari hauek mendia aukera dute euren azken jarduera ikusgarria egin ahal izateko. Mont Blanc izan da eremua. Protagonista frantziarrok BASE jauzia eta abiadura bateratuz, “bidaia” ikaragarria zein zorabiagarria egin dute. Helikoptero batetik jauzi egin zuten, eta, hegal-trajeak lagunduta, mendi enblematiko horren ertzetik ibili ziren.

Les Houches herria izan zuten helmuga. 7,5 kilometro eta 3.650 metroko desnibela dituen hegaldi horretarako soilik hiru minutu behar izan zituzten. 200 kilometro orduko abiadura hartu zuten, eta, bideoan ikusten den bezala, zehaztasun handia behar da ertzen, serac-en eta glaziarren artean maniobratzeko. Antza denez, hegal-traje batekin egin den hegaldi luzeena izan da frantziarrena.