Gazako Al Shifa ospitalea zaurituz beteta dago, Israelen bonbardaketen ondorioz. Familia osoak heltzen dira bata bestearen atzetik eta medikuak eta erizainak gainezka daude. «Egoera katastrofikoa da», ohartarazi dute tokiko agintariek.

Akram Al Haddad, 25 urtekoa, bere urte eta erdiko ilobaren ohe ondoan dago; bere lau urteko anaia eta beste 16 pertsona hil zituen bonbardaketa batean zauritu zen. Gazako hego-ekialdean daukaten familiaren etxea suntsitu zuen eraso batek eta haurtxoa eta bere gurasoak bizirik atera ziren, Akramek kontatu duenez. Aita eta ama ere zaurituta daude.

Umeak «premiazko ebakuntza behar du, buruan duen zauriagatik», azaldu du bere medikuak. Arazoa da «ebakuntza gela bat erabilgarri egon arte itxaron behar duela». «Aparteko egoeretan lan egiten dugu, eta etengabeko hornidura elektrikoa eta beharrezko materiala bermatu behar ditugu edozein ebakuntza egin aurretik», azaldu du horretaz arduratzen den medikuak. Abdallah izenaz soilik identifikatzeko eskatu du.

Hamasek 2007tik kontrolatzen duen Gazako eremua bonbardatzen ari da larunbatetik Israel, aurrekaririk gabeko palestinar milizien erasoaldiari erantzuteko. Guztira, eta behin-behineko datuen arabera, 950 pertsona hil eta 5.000 zauritu dira alde palestinarrean, tokiko agintariek jakitera eman dutenez. Gazako Al Shifa ospitalean pertsona «asko» daude beren txandaren zain larrialdietako gelan. Baina «batzuk hil egiten dira» artatu baino lehen, damu da Abdallah.

«Zauritu asko artatzen ditugu, gehienak aldi berean iristen diren emakume eta haurrak, azaldu dio AFP agentziari Mohammad Ghoneim medikuak. Larrialdietan lan egiten du, eta hizketan ari dela beste zortzi zauritu iritsi dira: hiru emakume, bi ume, bi gazte eta gizon heldu bat.

«Ospitalearen gaitasun mugatuak biktima kopurua handitzen du», ohartarazi du mediku honek. Baliabide medikuez gain, argindarra, ura eta oxigenoa falta zaizkie.

Israelgo Defentsa ministro Yoav Gallantek astelehenean iragarri zuen «blokeo osoa» ezarriko zutela Gazako eremuan. «Ez elektrizitaterik, ez janaririk, ez urik», esan zuen. Gazako Osasun Ministerioak ohartarazi duenez, material mediko faltak «hondamendi egoera» ekarriko du Palestinako gune horretan, 2,3 milioi pertsona bizi baitira bertan. Zortzi ospitale «ez dira nahikoak herritarren beharrei erantzuteko», ziurtatu du.

«Ez dute nora joan»

Israelen bonbardaketek Beit Hanoun ospitalea kaltetu dute, iparraldean, baita Al Chifa ospitaleko jaioberrien medikuntza zerbitzua ere. Salameh Maaroufek, Hamasek zuzentzen duen Gobernuko prentsa bulegoko zuzendariak, deitoratu du Gazak ez duela sendagairik, material medikorik, eskanerrik eta erradiografietarako gailurik. Arduradunak «Israelen okupazioari» leporatzen dio «nahita sortzea egoera humanitario miserable bat, murrizketen edo erasoen bidez».

Etxebizitzarik gabe geratu ziren familia askok babesa aurkitu dute Al Chifa ospitaleko korridoreetan eta lorategietan. Artatu ondoren, batzuek ez dute nora joan. «Nire etxea erabat suntsitu zen. Etxe guztiak suntsituak izan ziren hemen», dio 39 urteko Abu Ashour Sukaykek.