Asteazken honetan, azaroaren 29an, Palestinarekiko Nazioarteko Elkartasun Eguna ospatzen da. Aurten, Israel Gazaren eta palestinarren aurka egiten ari den eraso bortitzaren testuinguruan, elkartasun adierazpenak errepikatu dira Euskal Herriko hainbat herritan.

Getxon, esaterako, EH Bilduk Palestinako bandera erraldoia jarri du Arrigunaga hondartzan, Bilboko portuaren aurrean.

🇵🇸✊🏾 Palestina askatu! Genozidioa gelditu!

Gaur, azaroak 29, Palestinarekiko Elkartasunaren Nazioarteko Egunean, bandera erraldoia jarri dugu Arrigunaga hondartzan, Bilboko portuaren aurrean.

🌊 From the river to the sea, Palestine will be free!#PalestinaResiste pic.twitter.com/2jzIOySnqP

— EH Bildu Getxo (@GetxokoEHBildu) November 29, 2023

Gasteizko Parlamentuak Palestinako bandera bere eraikinaren leihoetako batean jarri du Palestinako Herriarekiko Elkartasunaren Nazioarteko Eguna ospatzeko. Horretaz gain, ostiral honetan Legebiltzarreko Palestina eta Ekialde Hurbila Babesteko Taldeartekoak bilera egingo du gure lurraldean bizi den diaspora palestinarrarekin.

Bilbon, Kakitzat erakunde antimilitaristak espainiar Gobernuaren Ordezkaritzaren aurrean egin du ekimena, «Palestinako genozidioan espainiar eta euskal erakundeen eta enpresen parte hartzea» salatzeko.

Haien datuen arabera, espainiar Gobernuak Israeli 40.037.081 euroko balioa duten armak saltzeko baimena eman die enpresei 2020tik. Zehaztu duenez, 2020an 69 lizentzia baimendu ziren, 17.736.842 euroko balioarekin. 2021ean 55 lizitazio egin ziren, 13.010.804 eurogatik. Azken datuen arabera, 2022an 23 lizitazio baimendu ziren lehen seihilekoan, 9.289.435 euroko balioarekin. Gainera Israelgo estatua espainiar Defentsa Ministerioaren rankingean seigarren postuan dago esportazioetan eta bederatzigarrenean material militarraren inportazioetan.

«Zalantzarik gabe, erakunde sionista armamentu hori erabiltzen ari da Palestinaren okupazioa indartzeko, gerra, apartheid eta garbiketa etnikoko politika genozidaren bidez. Ezinbestekoa da Israelgo estatuarekin lankidetza, negozio eta harreman oro berehala etetea, eta Palestina aske batean bakean bizitzeko Palestinako herriak duen eskubidea errespetatzea», adierazi du Kakitzatek.

Osakidetzako Langileen Saretik (OLAS) Palestinako osasun langileei eta herriari elkartasuna adierazi diete, «euren autodefentsa, autonomia, segurtasuna eta askatasuna lortzeko bidean».

OSASUN LANGILEOK PALESTINAREKIN ELKARTASUNA.
🇵🇸🇵🇸🇵🇸Osakidetzako LAngileen Saretik (OLAS) Palestinako osasun-langileei eta herriari gure elkartasuna adierazi nahi diegu, euren autodefentsa, autonomia, segurtasuna eta askatasuna lortzeko bidean.

IZILIK GERATZEA EZ DA AUKERA BAT. pic.twitter.com/r2E6q7Sjc1

— OLAS_Osakidetzako_LAngileen_Sarea (@olas_osakidetza) November 29, 2023

Arratsaldean, Palestinarekin Elkartasuna ekimenak mobilizazioak antolatu ditu Bilbon (Udaletxean) eta Gasteizen (Andre Maria Zuria Plazan) eta Iruñean (Udaletxean) 19.00etan. Elkarretaratze horietan, salatu dute «urte hau odoltsuenetakoa izaten ari dela Palestinarentzat».

«Gazako Zerrendaren aurkako egungo erasoan, erakunde sionistak 19.000 palestinar baino gehiago hil ditu, gehienak haurrak eta emakumeak. Urriaren 7az geroztik, okupazioaren eraso militar ugari izan dira Zisjordanian, eta 200 palestinar baino gehiago hil eta 4.000 palestinar inguru bahitu dituzte. Eta kolono sionisten indarkeria inoiz baino bortitzagoa izaten ari da», salatu dute.

Zentzu horretan, gogoratu dute azaroak 9 egunaren duen garrantzia, eta Euskal Herritik Palestinara bidaltzen dituzten elkartasun-adierazpenak: «Beste behin ere erakutsi berri dugu Palestinako herriari baldintzarik gabeko babesa ematen diogula, eta haren borondateari eta duintasunari errespetua eta miresmena diegula, bere lurrean irauteko eta bere askapenaren alde borrokatzeko».