Europako Batzordeak arau-hauste prozedura bat ireki du Metaren aurka, uste baitu Facebookek eta Instagramek mendekotasuna sustatzen dutela adingabeen artean, eta enpresak ez duela neurri eraginkorrik hartu hori konpontzeko.

«Ez gaude ziur nahikoa egin duenik zerbitzu digitalen legearen betebeharrak betetzeko, Europako gazteen osasun fisiko eta mentalerako ondorio kaltegarrien arriskuak murrizteko Facebook eta Instagram plataformetan», esan du Thierry Breton Europako Barne Merkatuko komisarioak.

Bruselak uste du Facebookek eta Instagramek erabiltzen dituzten algoritmoek «adingabeen ahultasuna eta esperientziarik eza esplotatzen» dutela, haien interesen arabera erakusten dietelako edukia, sare sozialekiko mendekotasuna sustatuz, ohar batean azaldu duenez.

Halaber, uste du Facebook eta Instagrameko adina egiaztatzeko tresnak ez direla ez zentzuzkoak, ez proportzionatuak, ez eraginkorrak, adingabeak eduki desegokietara sar ez daitezen.

Gainera, Facebookek eta Instagramek lehenetsita dituzten pribatutasun eta segurtasun neurriek ez dituztela adingabeak behar bezala babesten dio Bruselak.

Metak iaz bidali zion arrisku azterketa aztertu ondoren, Europako Batzordeak susmatzen du enpresa zerbitzu digitalen legea urratzen ari zela, eta horregatik erabaki zuen ikerketa irekitzea.

Ikerketa honek ez du denbora mugarik, eta Batzordeak kautelazko neurriak har ditzake Facebook eta Instagramen aurka, TikTok ekimenarekin egin zuen bezala, espainiar eta frantziar estatuetan ireki zuen Lite bertsioko puntuen programa bertan behera uztera behartuz.

Zerbitzu digitalen legea indarrean sartu zenetik –plataformak adingabeak babestera, legez kanpoko edukia ezabatzera eta algoritmoen diseinuan gardentasun handiagoa izatera behartzen ditu–, Bruselak lau arau-hauste prozedura ireki ditu Metaren aurka, bi TikTok enpresaren aurka eta bat AliExpressen aurka.