Benetako gertaeretan oinarritutako ‘Le procès du chien’ (‘El juicio del perro’) filmak abokatu baten eta haren bezeroaren istorio bitxia kontatzen du: Cosmos izeneko txakurrarena.

Laetitia Dosch aktoreak zuzendu du, eta zuzendari gisa egin duen lehen film da. Kasu erreal bat du inspirazio-iturri: gizon frantses bat auzitara eraman zuten bere txakurraren erasoengatik. Prozesu hori Giza Eskubideen Europako Auzitegira ere iritsi zen.

Satira honen bidez, Doschek gizakien eta animalien arteko harremana aztertuko du, animalien defentsan aditua den Avril (Dosch) abokatu gaztea ardatz hartuta. Neskak, Cosmos defendatzeko erronka onartuko du; garbitzaile bati hozka egitea eta aurpegia desitxuratzea leporatzen diote, eta emakumeei bakarrik eraso egitea.