Halfdan Ullmann Tøndel (Liv Ullmann eta Ingmar Bergmanen biloba) norvegiarrak idatzi eta zuzendutako lehen film honek Urrezko Kamera irabazi zuen Cannesen. Bere film laburren estilo zinematografiko berritzaileagatik eta giza konplexutasunak aztertzen dituzten gaiak lantzeagatik da ezaguna.

Elisabeth (Renate Reinsve) eskolako zuzendaritzarekin premiazko bilera bat egiteko deitu dute. Zerbait gertatu da Armand semearen eta Jon klasekidearen artean, biak sei urtekoak. Inork ez daki zehazki zer gertatu den: haur jolas bat besterik ez da izan, ala zerbait serioagoa? Berehala azaleratuko dira guraso eta irakasleen arteko sekretu eta gaitzespenak eta bileraren kontrola galdu egingo da. Gatazka biziak eragingo ditu, eta haurtzaroko sexualitatea eta jokoaren eta indarkeriaren artean dauden eremu grisen erruduntasuna edo konplexutasuna agerian geratuko dira.

Lokalizazio bakarra

Eszenatoki bakar batean girotzeari buruz, Tøndel zuzendariak zera aitortu zuen filmaren aurkezpenean: «Niretzat, oso gauza naturala izan zen horrela egitea. Logistikoki filma kokaleku bakar batean kokatzea oso erraza zela sentitu nuen, eta bitxiena zera izan zen, behin dena leku bakar batean gertatuko zela erabaki nuenean, ideiak berehala hasi zirela sortzen, ia automatikoki».

Zuzendariaren arabera, ikuspegi horrek ekoizpena erraztu ez ezik, inguruko txoko bakoitza ustiatzeko ateak ere ireki zituen. Eskola, filmean leku lasai eta familiar moduan hasten dena, espazio ia magiko baina beldurgarri bilakatzen da pixkanaka: «Eskola leku ia magiko bezala begiratu nuen, baina amesgaizto bihur zitekeena», gehitu du Tøndelek, atmosferako aldaketa sotilek historiaren garapenean berebiziko garrantzia dutela azalduz.