Avanza Gipuzkoa autobus zerbitzuan greba deitu dute bihar hasi eta heldu den astelehenera arte, bost egunez. Enpresa Batzordeak (ELAko sei ordezkarik eta LABeko eta Aurrerako banak osatua) salatu du azken bileran ez dela aurrerapausorik eman eta enpresak uko egin diola plantillaren bi aldarrikapen nagusi kontuan hartzeari: lanaldi murrizketa eta lan denbora zenbatzea, zeregin batzuk zenbaketatik kanpo ez uzteko, hala nola jendea hartzea eta uztea.

Astearte honetan egindako bilkuraren aurretik, Batzordea Azahara Dominguez Gipuzkoako Mugikortasun sailburuarekin bildu zen, enpresarekin dituen negoziazioen egoeraren berri emateko eta lanaldi murrizketa lortzeko bere inplikazioa eskatzeko.

«Aldundia ados agertu zen sindikatuok egindako eskaerarekin, eta adierazi zuen enpresarekin akordioa lortuz gero, Aldundiak konpromisoa hartuko zuela hurrengo lizitaziorako 1.592 orduko lanaldi-murrizketa bermatzeko. Hala ere, enpresak adierazi du Aldundiak ez duela murrizketarik ezarri nahi, eta horregatik zuzendaritzak ez duela hobekuntzarik planteatzen eduki honen gainean», azaldu du ELAk ohar batean.

Batzordean gehiengoa izanik, sindikatu honek Avanzari eta Gipuzkoako Foru Aldundiari eskatu die lehentasuna eman diezaiotela sektore honetan lanaldiak dakarren arazoa konpontzeari, eta lehenbailehen ekar dezatela proposamen bat negoziazioetara gatazka konpontzeko.

Aldarrikapenak

Honakoak dira plantillaren aldarrikapenak: «KPIa gainditzen duten soldata-igoerak; urteko eta eguneroko lanaldi-murrizketa, hau da, egunean egindako lan guztia eguneroko lan gisa zenbatzea, lanaldiak zenbatu gabe utzi gabe; txanda-kontratua nahitaezkoa izatea, ez bakarrik hitzarmen honen indarraldian, baita modu mugagabean ere; behin-behineko lana erregularizatzea eta autobus flota hobetzea».

Datozen bost greba egunekin jada 18 izango dira greba egunak, eta, egoera konpontzen ez bada, mobilizazioak eta protestak areagotuko dituztela abisatu dute.

Langileek kotxe karabana bat egingo dute ostiral honetan Debako eskualdean. Astelehenean, berriz, elkarretaratzea egingo dute Gipuzkoako Foru Aldundiaren aurrean.