Martxoaren 31n amaitzen da epea Astilleros Balenciaga enpresaren likidazioa ekidin eta inbertsore berriak bilatzeko, eta ontziolako langile-batzordeko ordezkariek agerraldia egin dute astelehen honetan Gipuzkoako Batzar Nagusietan. Azaldu dutenez, bi inbertitzailek interes handia dute enpresan sartzeko eta, testuinguru horretan, premiazko neurriak hartzeko eskatu diete erakunde publikoei.

Langileen Batzordeko presidenteak, David Tejerak (CCOO), negozioaren bideragarritasuna defendatu du berriro. LABeko Imanol Belokik berriro ere Cofides sozietate publikoari egotzi dio enpresaren jarraipenerako oztopo nagusia izatearen erantzukizuna, bere ustez, «bideragarritasun-plana babesteari uko egitea faktore erabakigarria izan baitzen krisiaren larriagotzean».

Batzordeak dei egin dio Lakuak eta espainiar Gobernuak, Gipuzkoako Aldundiak eta Zumaiako Udalak parte hartzen duten mahai instituzionalari erantzun zehatzak eta esku-hartze eraginkorrak eskain ditzan.

Maria Jesus Egido PSEko batzarkideak adierazi duenez, Ekonomia Ministerioa enpresaren bideragarritasuna bultzatzeko lanean ari da, eta «laster» irtenbide baten berri emango ahal duela aurreratu du.

EH Bilduk politika industrial «proaktiboa» eskatu du

Langileekin izan da Zumaiako alkate Iñaki Ostolaza (EH Bildu) eta, batzarra hasi aurretik hedabideei egin dien adierazpenetan, administrazioek politika industrial proaktiboa egiteko beharra berretsi du.

Batzar Nagusietan Astilleros Balenciagaren egoerari buruzko agerraldian egon gara, langileei eta proiektuaren etorkizunari Udalaren babesa emanez. pic.twitter.com/bERE3buv4z

— Iñaki Ostolaza Esnal (@inakiostolaza) March 3, 2025

«Ikusi dugu Talgo enpresarekin berriki hartu den erabakia. EH Bilduk guk begi onez ikusten du, eta bide horretan sakontzea ezinbestekoa da. Jaurlaritzak eta kasu honetan baita Aldundiak ere euste eta defentsiban oinarritutako politika industrialetik atera eta proaktiboan estrategikoak diren enpresak eta industriari babesa emateko ordua iritsi da; areago, Gipuzkoak bizi duen ekonomiaren tertziarizazioari aurre egiteko», dio indar subiranistak.

Gogoratu duenez, 2022ko abenduan Astilleros Balenciaga enpresaren zuzendaritzak langileei jakinarazi zien diru-sarrera gehiagorik ez zegoela eta nominak ordaintzeko arazoak izango zituela azken eskaerak amaitu ostean.

«Ordutik hainbat mugimendu egin da itxiera ekidin eta berriz bideragarri egiteko. Ildo horretan, Zumaiako Udala bezala EH Bildu ere, lehen momentutik aritu da Balenciaga ontziolaren bideragarritasuna eta irekita mantentzearen aldeko lanean buru-belarri, sinistuta baitago estrategikoa den industria eta, oro har, aktibitate ekonomikoaz ari garela, ez soilik Zumaiarako, baita Urola Kosta eskualdearentzat, eta baita Gipuzkoa osoarentzat», dio EH Bilduk.