Baiona txarkuteriako profesional eta zaleen topagune da egunotan. Lagunartekoa, prestigiotsua, emankorra... Mendez mende egiten den merkatu hau lanbidearentzako funtsezko ekitaldia da. Batzuentzat ezinbertzekoa, bertzeentzat ohitura zaharra, gaurtik igandera arte ospatuko da.

Etxaldeko xingarraren txapelketa izan da aurreneko ekitaldia. Lehen saria Urepeleko Amelie Etxeparerentzat izan da. 2.700 euro ordaindu dituzte enkantean 14,3 kiloko piezagatik.

Estatu Batuetan jaioa, hamar urte inguru daramatza Etxeparek lehiaketan parte hartzen eta 2023an nahiz 2024an aurkezpen onenaren saria jaso zuen. Oraingoan, 25 ekoizleren artean nabarmendu da. Bigarren saria bitan banatu dute, eta Tarnoseko Pascal Membrede eta Baiona bertako Thomas Latour izan dira garaileak. Hirugarren saria, aurkezpena baloratzen duena, Gerderesteko Daniel Tailleurrentzat izan da.

Urteko ekitaldia

Abeltzainak, janari gazituak egiten dituztenak zein ostalariak, denak bat datoz: Xingar Azoka da urteko ekitaldia, Baionako txarkuteria industria ospetsuko eragile guztiak biltzen dituena. 562. edizioa du jada, eta bertze behin, dastatze, tradizio eta jai jarduerez betetako lau egun eskainiko ditu. Familia, prestigio eta negozio istorioak nahasten dira hemen eta horrek azaltzen du zergatik itzultzen diren urtero erakusketariak eta parte-hartzaileak.

Jean-Pierre Gastellou, izen bereko negozioaren kudeatzailearentzat, errate baterako, ohitura zaharra da Azoka. «40 urte daramatzat etortzen. Place du Réduit-en hasi nintzen, gero Carreau des Hallesera joan nintzen, eta orain Quai [Augustin] Chaho-n gaude», azaldu du.

Dena den, Azoka salmenta negozioa da batez ere, non artisauek ehunka pieza saltzen dituzten xerratan, laurdenetan, erdietan eta, gutxi batzuetan, baita zati osoetan ere.

Erakusleiho aparta

Saran egoitza duen Maison Arkarentzat ekitaldia erakusleiho bat da. 2021ean sortua, konpainia gazteak 60 urdaiazpiko inguru saltzen ditu urtero Roland-Barthes zelaigunean duen postuan. Marianne Sage harakinak adierazi duenez, jende ugari joaten da zuzenean Sarako beren dendara azokaren ondotik.

Saint-Esprit Baionako Aubard delicatessen dendako Cedric Bergezek erran duenez, urte osoan saltzen diren piezen ia %10 lau egun hauetan saltzen dira. Baina zuzeneko salmentaz harago, Azoka profesionalen topagunea da, non artisau-harategiak eta ostalariak elkartzen diren.

Banatzeko bideak zabaltzeko aukera da, Bergezen esanetan. «Beste eskualde batzuetatik asteburu bat pasatzera etortzen diren harakin anitz ezagutzen ditugu. Dagoeneko izan ditugu Azokara bisitari gisa etorritako bezero profesionalak, gero bezero bihurtu direnak», kontatu du.