Euskal Herrian, Katalunian eta frantziar zein espainiar estatuetako Pirinioetako eskualdeetan esnekiak kontsumitzeko ohiturekin lotutako elikagaien jasangarritasunari buruz egindako azterketa aurkeztu du Gasteizko Azoka plazan Poctefa Know N Cheese proiektuak. Pirinioen bi aldeetako 6 erakunde biltzen dituen egitasmo europar honek esne ustiategi eta gaztagintza tradizionalen lehiakortasuna areagotzea du helburu, haien jasangarritasuna bultzatuz.

1.500 lagunen parte-hartzea izan duen azterketa honetatik ateratako datuen arabera, gozamena da eskuz egindako gazta erosteko lehen motibazioa. Izan ere, galdetutakoen %79k erabaki du gazta mota hori kontsumitzea produktuak dituen zaporeagatik eta kalitateagatik.

Jasangarritasuna eskuz egindako gaztaren ekoizpenaren baliotzat hartzeari dagokionez, aipatzekoa da kontsumitzaileek ez dutela, itxuraz, ekoizteko modu horren ingurumen jasangarritasuna erosteko motibaziotzat hartzen. Bakarrik %20 inguruk.

Hala ere, jasangarritasun ekonomikoa eta soziala bai dira eskuz egindako gazta erostera bultzatzen duten balioak. Beraz, inguruko ekonomiari eta negozio ekoizle txikiei laguntzea bai dira eskuz egindako gazta erosteko motibazioak. %55ek gazta mota hori aukeratzen dute tokiko ekoizleei laguntzeko, eta %50ek bertako produktua delako.

Eskuz egindako gaztei lotutako elikagaien jasangarritasuna positiboki balioetsi den arren, prezioa da erosteko azken erabakian eragin handiena duen faktorea. Kontsumitzaileen %68k bozkatu zuten erosteko motibazio gisa.

Ateratako beste ondorio nagusietako bat da osasuna edo eskuz egindako gaztak produktu osasungarriak izatearen pertzepzioa ez direla erosteko motibazio handia. Galdetutako pertsonen %20 ingururentzat baino ez.

Erosteko uneak eta lekuak

Ikerketaren beste emaitza batzuek agerian utzi dute, oro har, kontsumitzaileek hipermerkatuetan edo supermerkatuetan erosten dutela gazta, eta ehuneko txiki batek baino ez duela gaztandegietan edo merkatuetan zuzenean erosten. Horrenbestez, balio-kate luzeagoak eta ez jasangarriak aukeratzen dituzte eta, oro har, gaztandegietan eragin ekonomikoa dutenak.

«Ondorioz, gaztandegi horiek prezio egokiagoak izan behar dituzte linealean agertzeko (prezio lehiakorrak), eta horrenbestez, a priori, esan daiteke joera txikia dagoela produktu jasangarriagoengatik gehiago ordaintzeko», dio Poctefa Know N Cheese proiektuak.

Izan ere, galdetutako pertsonen %45 inguruk ez dituzte produktu horiek erosten, batez ere garestiak direlako. Baina produktuari buruz zenbat eta informazio gehiago izan (eskuz egindakoa izatea, ekoizteko modua, etab.), kontsumitzaileek orduan eta joera handiagoa dute eskuz egindako gazta batengatik prezio handiagoa ordaintzeko.