Aurtengo Giroak benetako lehen etapa menditsua izan du astearte honetan. Mortirolo asteazkenean iristekoa den honetan, ikusmen handia zegoen faboritoek nola erantzungo zuten ikusteko. Eta, alde horretatik, lasterketak ez du hutsik egin. Etapako garailea Astanako Christian Scaroni izan da, bere taldekide Lorenzo Fortunatorekin elkarri eskutik helduta gurutzatu baitute helmuga.

Sailkapen nagusian, aldiz, Richard Carapazek (Education First) dena nahastu du Juan Ayusoren beherakada itzelaz eta Isaac del Toro liderraren ahuleziaz jabetuta, eta Primoz Roglicek lasterketa utzi duela ikusterakoan. Azken igoeran mexikarra eta Simon Yates atzean utzi, eta 1:36ko tartea lortu du sailkapen nagusian hirugarren ipintzeko.

Euskaldunek protagonismoa izan dute ere nahasmenaren etapan. Izan ere, Pello Bilbao, Jon Barrenetxea eta Xabier Mikel Azparren eguneko ihesaldian egon dira. Bahrain taldekoa izan da azkena amore ematen. Pena bat da Gernika-Lumoko txirrindularia ez dela sasoi onean iritsi Girora.

Gauzak hala, asteazken honetan beste Giro bat hasiko da igandean Erromako kaleetara iritsi aurretik. Ayusok beste zeregin garrantzitsu bat izango du: Del Torori maglia arrosa zaintzen laguntzen. Carapazek, berriz, asteazkeneko, ostiraleko eta larunbateko etapa menditsuak izango ditu lagun lider jartzen saiatzeko. Visma taldeko Simon Yates britaniarra oztopo izaten ahaleginduko da.

Carapaz, indartsuena

«Bagenekien etapa gakoa zela, asko lan egin dut egoera honetara iristeko. Beste urte batzuetan ez nuen osasuna ezta zortea izan, baina altxatzen eta berriro saiatzen jakin nuen. Borrokan nago eta Erromaraino ez dut etsiko», azpimarratu du helmugan Carapazek.

Eta hala erakutsi du gaurkoan. Piazzola sul Brenta eta San Valentino bidean ezusteko ugari gertatu dira: Joshua Tarlingek erorikoa izan du euriarengatik eta ospitalean amaitu du, Primoz Roglicek lasterketa uztea erabaki du, Egan Bernalek eta Carapazek berak erorikoak izan dituzte, Ayusok asko sufritu du 'geldialdi tekniko' batean ondoren faboritoen taldera iristeko...

Santa Barbarako igoerak txirrindularien ahuleziak agerian utzi ditu. Lehenik, UAEko liderra izan da 'kanporatuta' geratu dena. Ondoren, Bernalek asko sufritu behar izan du atzeko partean, baina kolonbiarrak hortxe mantentzea lortu du. Aurrean, berriz, etapako garaipena bi gizonen esku geratu da, eta biak Astanakoak: Christian Scaroni eta Lorenzo Fortunato. Hauek Movistar taldeko Jefferson Cepeda utzi dute atzean.

Eta are atzerago, Carapazek behin-betiko kolpea eman du, Del Toro liderra eta Simon Yates geldirik utziz. Ekuatorreko gizonak turboa ipini eta urduri jarri ditu aurkariak 6 kilometroren faltan. Aurretik, Fortunatok 27 urteko Scaroniri utzi dio irabazten, ibilbideko seigarrena eskuratzeko. Eta begirada guztiak atzera joan dira berriro ere. Carapazek hortzak estutu ditu helmugaraino ahaztezina izango den egunean.