Kemen Aldabek eta Endika Barrenetxeak "Erremontari" saioko 2025eko ekitaldia irabazi dute, Galarreta pilotalekuan astelehen gauean Sagardoaren Txapelketako final handia irabazi ostean. Aldabek eta Barrenetxea IV.ak Javi Urrizaren azken finalean txapelik gabe laga zuten aurrelari iruindarra eta Iban Larrañaga txapeldunordeak biak bi jokotan menderatu zituzten: 9-15 eta 7-15.

Galarretan giro bikaina izan zen uneoro, baina finalean markagailuan hainbat gorabehera izan ziren, finaleko. Esaterako, lehenengo jokoak hiru zati nabarmen izan zituen. Aurrenekoan Oialume Zarreko Kemen Aldabek eta Endika Barrenetxeak, Iñaki Lekuona kapitain zutela, sei tanto jarraian egin zituzten, eta 1-6 jarri ziren aurretik; Petritegiko Javi Urrizak eta Iban Larrañagak, Aritz Altadill kapitain zutela, beste sei tanto eginda erantzun zieten, bata bestearen ondotik, eta 7-6koa ipini zuten markagailuan. Bderdinketak markagailua 9na jarri zen arte iraun zuen, baina orduan Aldabek eta Barrenetxea IV.ak, beste behin sei tanto jarraian lortu zituzten, hamabosgarrenera iritsi  eta jokoa eskuratu arte. Hala, aurreneko jokoan hiru bolada izanda, lekunberriarrak eta hernaniarrak puntua eta patxada bere egin zituzten.

Bigarren jokoan, izan ere, Aldabek eta Barrenetxea IV.ak jokoa erabat kontrolpean hartzea lortu zuten, bai eta markagailuan ere, noski. Horren ondorioz, bistakoa da argi nagusitu zirela. Aurrelari nafarra eta atzelari gipuzkoarra 1-6 aurreratu ziren, lehenengo jokoan egindakoa hasiera aparta errepikatuz, baina bigarren jokoan ez zuten abantaila hori galdu, eta txapela eskuratu arte kontzentrazioa mantendu zuten.

Urriza eta Larrañaga ahalegindu ziren gogotik, baita hiru tantora gerturatu ere 5-8koan eta 7-10ekoan, baina Aldabek eta Barrenetxea IV.ak, aurreneko jokoa amaitu bezala amaitu zuten bigarrena ere; bost tanto jarraian egin zituzten, eta titulua irabazi zuten. Gainera, Endika Barrenetxeak txapelketako Pilotari Onenaren saria erdietsi zuen.

Atzelari hernaniarrak bere lehenengo txapela lortu du sagardoaren Txapelketan. Txapela hau falta zitzaion eta Oialume Zarrekin irabaztea «oso pozgarria» izan zaiola onartu zuen. Bestalde, Javi Urrizaren azken partida izan zen astelehenekoa eta amaiera duina eman zion bere kirol ibilbideari, nahiz eta ez zen amaitu aurrelari iruindarrak nahiko zukeen bezala.

Markagailuaren bilakaera:

Lehen jokoa: 1-0/1-1/1-2/1-3/1-4/1-5/1-6/2-6/3-6/4-6/5-6/6-6/7-6/7-7/8-7/8-8/8-9/9-9/9-10/9-11/9-12/9-13/9-14/9-15.

Bigarren jokoa: 0-1/0-2/0-3/1-3/1-4/1-5/1-6/1-7/2-7/2-8/3-8/4-8/5-8/5-9/5-10/6-10/7-10/7-11/7-12/7-13/7-14/7-15.