Bizkaiko autoeskolen sektoreko grebaren lehen egunean, langileek erantzun «zabala» eman diote ELA (%87,5eko ordezkaritza) eta CCOO (%12,5) sindikatuek egindako deialdiari. Sindikatuen arabera, mobilizazioak argi utzi du plantillak «nazkatuta daudela APAVI patronalaren immobilismoarekin eta negoziaziorako borondate faltarekin».

Zazpi bileraren ondoren, grebei hasiera eman diete astearte honetan sektoreko langileek; mobilizazioek jarraipena izango dute hilaren 16an eta 21ean.

«Patronalak ez du proposamenik aurkeztu sektorearen eskaera nagusiei erantzuna emateko: soldata KPIaren arabera eguneratzea, lan osasunean hobekuntzak egitea eta lanaldia murriztea, batez ere irakasleentzat. Administrazioko langileen kasuan, proposatutako neurriak ez dira nahikoak, lan kargei eta kontziliazio premiei erantzun gabe», adierazi dute sindikatuek.

Mobilizazioa goizeko lehen orduan hasi da, kontzentrazio batekin, eta manifestazio jendetsuan abiatu dira Bilboko Casilda Iturrizar parketik patronalaren egoitzaraino. Ibilbidean zehar, plantillaren erosahalmena bermatzea eta lanaldiaren murrizketan aurrera egitea eskatu dute.

ELAk eta CCOOk proposamen zehatz eta eraginkorrak mahai gainean jartzea eskatu diote APAVIri, «blokeatutako negoziazioan aurrera egin ahal izateko». Langileek argi utzi dute: aurrerapausorik gabe, greba gehiago izango dira.

Grebaren bigarren egunean, uztailaren 16an, mobilizazio gehiago egingo dituzte, besteak beste, auto karabana bat egingo dute Bizkaiko hainbat herritan.