Lointek Gernika Bizkaiak Emakumeen Eurocupa jokatuko du 2025/26 denboraldian. Albistea jakina zen aurreko astean klubak jakinarazi zuelako. 2017/18 denboralditik zazpi urtez jarraian ibili zen talde gernikarra Europan zehar, baina iaz ezin izan zuen jokatu liga txapelketan ez zuelako sailkapenik lortu. Aurten ere, Emakumeen Endesa Ligan bederatzigarren amaitu ostean, ez zegokiokeen Europan aritzea, baina azken orduan, talderen batek atzera egin ondotik, FIBAren gonbita jaso du eta, hala, zortzigarren aldiz jokatuko du talde bizkaitarrak Europan.

Gauzak hala, Gernikak asteazken honetan bertan konfirmatu duenez, Eurocup Women txapelketako kanporaketa jokatu beharko du. Talde bizkaitarra multzo burua izango da uztailaren 23an Munichen egingo den zozketan. Sailkapen faseko joaneko partida irailaren 18an izango da, eta itzulerakoa, berriz, 25ean Malosten.

Zozketan izango dituen aurkarien artean hauek ageri dira: SBS Ostrava (Txekiako Errepublika), DSK Basketball Brandys (Txekiako Errepublika), Panathlitikos Sykeon (Grezia), Pas Giannina (Grezia), BBC Troistorrents-Chablais (Suitza) eta UZKK Student Nis (Serbia).

Urte borobila izatea espero du 2025/26 denboraldia klub gernikarra, izan ere, aurten 30 urte beteko dituelako. Ez dago urteurrena ospatzeko modu hoberik ostera ere Europan jokatzen baino.