Basque Culinary Centerrek GOe - Gastronomy Open Ecosystem paisaia-proiektua aurkeztu du astearte honetan. Planteamendu horren arabera, «Donostiako hiri-sare berdean integratutako espazio ekologiko biodibertsitatedun» bilakatuko da eraikina. Aurkezpenean Joxe Mari Aizeaga Basque Culinary Centerreko zuzendari nagusiak, Paz Simon Basque Culinary Centerreko Eragiketetako zuzendariak eta Iñigo Segurola paisajista eta proiektuaren arduradunak izan dute hitza. 

GOe «konektore berde» gisa aurkeztu dute arduradunek. «Natura eta hiria lotzea» izango da proiektu honen helburu nagusia, tokiko ezaugarri espezifikoak jasaten dituzten espezieak landatzen ari baitira, modu horretan, «hirira natura-kantitate handiagoa sartzea» ahalbidetuz. Horri esker, aurreikusten dute «biodibertsitatea handiago bat eta ingurune aberats eta osasungarriagoa bai landare, animalia zein pertsonentzat». 

Azaldu dutenez, «proiektuak nabarmen indartzen du Donostiako Udalak jasangarritasunaren, biodibertsitatearen eta arkitekturaren eta naturaren arteko bizikidetza harmoniatsuaren alde duen konpromisoa». Horrela, hirigunean ekosistema «ireki eta berdea» sortzeko urratsa ematea aurreikusten dute.

Eraikinak 1.329 m²-ko landaketa-eremua du estalkian eta 2.271 m²-ko «berdeguneak» urbanizazio osagarrian, Paz Simonek ez du aintzat hartu izan nahi, «guztira 3.600 m² espazio berde» eskainiko dituztela. Ingurune horretan 51 landare-espezie desberdin bilduko dira, 7.500 ale baino gehiagotan banatuta, «hiriko biodibertsitatea eta ongizatea sustatuz».

Urrats berritzaileak

Ekosistema berritzaile honen diseinuak uraren kudeaketa jasangarria ere aurreikusten du, Segurolaren hitzetan, «estalkiko landarediak euri-ura bereganatu eta aprobetxatuko du, isurketa-arazoak saihestuz eta ureztaketarako baliatuz». Halaber, gehitu du, «urteko sasoi desberdinetan loraldia izango duten espezie anitz landatu dira», naturaren dinamismoa eta kolorea eskaintzeko.

Parke lineala ere sortu da eraikinaren atzealdean, Manteo Ikastolarekin mugakide, eta horrek bertako giroaren baldintzak, hala nola, itsasoko haize-gazitua,  jasango dituzten zuhaitzak barne hartu ditu.

Proiektu honekin, Basque Culinary Centerrek aurrerapauso berria eman nahi izan du Donostiako «hiri-ekosistema jasangarria, berritzailea eta biodibertsitatez aberats» baten alde. Aizeagak  konbentzituta azpimarratu du, «Donostia, hirietako estrategia berdeen erreferente bihurtzen duen beste elementu bat izango da».