‘Gure auzoko memoria. Zaramaga atzo, gaur eta bihar’ proiektua jarriko du martxan Gasteizko Udalak auzo horren «memoria berreskuratzeko, oraina islatzeko eta etorkizuna diseinatzeko», 110.000 euroko aurrekontuarekin.

Udalak jakinarazi duenez, auzoaren nortasuna, emakumeen papera, migratzaileen bizipenak eta Zaramagako mota guztietako erakunde eta elkarteen lana islatzen duten ikus-entzunezkoak bildu, sailkatu, digitalizatu eta ikusaraziko dituen ekimena da.

«Azken zazpi hamarkadetan gertatutakoaren memoria gal ez dadin lagundu nahi dugu, eta, gainera, gaurkoa islatzeko eta biharkoa eraikitzeko balio diezagun», laburbildu du Miren Fernandez de Landa Gobernu Irekiko eta Gizarte Etxeetako zinegotziak.

Ekimen hau Lakuako Etxebizitza eta Hiri Agenda Sailaren Auzoak Biziberritzeko Inbertsio Estrategikoen Planaren barruan dago, eta Udalak Zaramaga auzoa hiri, gizarte eta ingurumen berroneratzean jarduteko duen konpromiso estrategikoetako bati erantzuten dio. Zehazki, auzoa biziberritzeko ekimenetako bat da.

Auzoaren lehen harria 1959ko maiatzaren 1ean jarri zen, gaur egungo Zaramaga plazako eraikinetan. Garapena oso azkarra izan zen, eta hasieratik langile izaera izan zuen, Euskal Herritik eta kanpotik etorritako pertsona eta familia langileei esker.

Zaramagaren nortasunerako 1976ko martxoaren 3ko sarraskia eta garai hartan inguruan zeuden lantegiek eragindako kutsadura ezabatzeko eskaerek ere esanguratsuak izan ziren. Gaur egun, Zaramaga oso auzo anitza da, eta 50eko eta 60ko hamarkadetan zein XXI. mendean iritsitako langileak uztartzen ditu.

Fernandez de Landak azaldu duenez, «aberastasun hori guztia gal daiteke memoria berreskuratzeko eta nortasun anitza, langilea, feminista, ekologista eta auzoaren defentsan eta balioan inplikatuta dagoena erakusteko ahaleginik egiten ez bada».

Berreskuratze hori lortzeko, Udalak lehiaketara atera ditu 110.000 euroko partaidetza ekintzak, sarbide errazeko web orri batean bildutako argazki, audio eta bideoen gordailu bat sortzea lortzeko, etorkizunean auzotik bertatik elikatu ahal izateko.

Asmoa da, gainera, saltokietan, fatxadetan, osasun zentroan eta elizetan, besteak beste, ikusgai jartzea. Era berean, Zaramagari buruzko dokumental bat egiteko asmoa dute. «Auzoaren memoria duen datu-banku bat izango dugu, askotariko ikuspegietatik eraikia eta oso baliotsuak komunitate-lanari esker», adierazi du zinegotziak.

Lankidetza sare bat

Irudiak lortzeko, auzokideak proiektuan inplikatzearen garrantzia nabarmendu du Udalak. Horretarako belaunaldien artean lan egitea, ikuspegiak partekatzea eta elkarrizketa sustatuko dituzten topaguneak sortzea nahi dute.

Beraz, helburua ez da soilik ikus-entzunezko materiala biltzea, baizik eta entitate, bizilagun, inguruko erakunde eta udal zerbitzuz osatutako lankidetza-sare bat sortzea. Lan horretan parte hartu nahi duten enpresek irailaren 1erako epea dute izena emateko.

«Zaramaga historia, bizipen eta gertakari gehien dituen hiriko auzoetako bat da, lehen Euskaditik eta Estatuko gainerako herrialdeetatik etorritakoak, eta orain beste belaunaldi batzuetatik etorritakoak», gogorarazi du zinegotziak, proiektu honen bidez «auzoaren bilakaera aztertu, bere nortasunean sakondu eta zabaltzen lagundu», nahi dela azpimarratu aurretik, «Gasteizko DNAren parte delako».