Palestinarekin Elkartasuna plataformak deituta, elkarretaratzea egin da ostiral honetan Bilboko Arriagan. Ekimen honen bidez, parte hartzaileek salatu nahi izan dute Gazako herritarrak jasaten ari diren blokeo, gosete eta genozidio egoera, eta horri aurre egiteko mobilizatu eta elkartasuna indartzeko dei egin dute.

Plataformak gogorarazi duenez, Palestinan bizitzen ari diren egoera ez da soilik bonbardaketen ondorio, baizik eta nazioarteko zuzenbidea urratzen duen blokeoa eta laguntza humanitarioaren ukazioa. Azken hilabeteetan 60.000tik gora lagun hil dira, 20.000 baino gehiago desagertuta daude suntsitutako eraikinen azpian, 100.000 zauritutik gora eta milaka lagun atxilotuta edo desagerrarazita indar okupatzaileen aldetik.

Gazako populazioa gosete larrian murgilduta dago deribatutako osasun krisi global batekin, eta CIF sistemaren arabera, «fase larrienean dagoen gosete planifikatu baten ondorioak jasaten ditu». Haurrek pairatzen dituzte ondoriorik latzenak, gosez hildakoen %80a haurrak baitira.

Plataformak salatu du, gainera, «laguntza humanitario geldialdiak» mendebaldeko potentziek eta erakundeek egindako «pantomima hutsa» direla, eta adierazi du zenbaitetan laguntza falta horrek hilabeteak daramatzala eta areagotu egiten duela krisi humanitarioa. Gainera, laguntza banatzeko unean bertan ere, milaka herritar tirokatuak izan dira kolono eta segurtasun indar sionisten eskutik.

«Genozidioa geldiarazteko sozialki eta politikoki indartu behar dugu borroka. Euskal Herritik ez gara isilik geratuko», adierazi du plataformak. Horregatik, mobilizazioarekin bat eginez, euskal erakundeei, alderdi politikoei eta enpresei eskatu diete «Israelgo entitate sionistarekin» daukaten harreman oro eteteko, izan ekonomikoak, kulturalak, militar edo instituzionalak.

Aldi berean, ohartarazi dute ez direla engainatuko «bi etsaituren soluzio faltsuarekin» eta aldarrikatu dute «Israelen desegitea eta Palestina osoaren deskolonizazioa,  ibaitik itsasora». Elkartasunaren ekimen honen bidez, Palestinako herriaren aldeko nazioarteko aste mobilizatzaileari ere atxikimendua eman diote eta herritarrak deituz gaur arratsaldeko kontzentraziora.