‘Barbarian’ filmarekin izandako arrakastagatik ezaguna den Zach Creggerrek zuzendutako beldurrezko film berria hemen da: ‘Weapons’.

Kasu honetan, desagerpen misteriotsu batzuei buruzko trama baten bitartez, beldurraren, thrillerraren eta misterioaren eremuan murgildu da zinemagilea.

Gela bereko ikasle guztiak, bat izan ezik, gau eta ordu berean era misteriotsuan desagertuko dira. 02.37an puntuan 17 nerabe beren etxeetatik desagertuko dira, indarkeriarik, lekukorik eta arrasto agerikorik utzi gabe. Gertaera lazgarri horrek herria hankaz gora jarri eta herritarren larritasuna areagotzen hasiko da.

Aktore zerrendan, Josh Brolin Archer Graff pertsonaiaren azalean sartuko da, bere semearen desagerpenak abaildutako aitarenean; Julia Garner Justine Gandy izango da, desagertutako nerabeen irakaslea; eta Alden Ehrenreich-ek Paul Morganen rola betetzen du, Justinerekin harreman zaila duen udaltzain ofizialarena.

Zach Creggerrek berak dioenez, «minutuek aurrera egin ahala xahutuz eta berrasmatuz doa filma»; horrek iradokitzen du “Barbarian” filmarekin ikusitako biraketa narratiboen estiloari jarraituko diola.

Ikusmina areagotzeko eta ikusleak filmaren misterioan guztiz murgiltzeko helburuz, maybrookmissing.net izeneko webgune biral bat jarri dute martxan. Eduki gehigarria eta desagerpenarekin lotutako sustapen-materiala eskaintzen ditu. 

Gidoi preziatua

‘Weapons’ filmaren gidoiaren enkantean Netflix, TriStar Pictures, New Line Cinema eta Universal etxeek parte hartu zuten. 24 orduko eskaintza eta kontraeskaintzen ostean, New Line-ek (Warner Bros-ekin elkarlanean) erosi zituen gidoiaren eskubideak. Creggerrekin akordio batera iritsi ziren, besteak beste, 38 milioi dolarreko aurrekontua eta azken muntaketarako eskubidea barne zituena. 

Jordan Peele zinegile ezaguna, bere Monkeypaw Productions konpainiarekin Universalekin batera enkantean parte hartu zuena, Joel Zadak eta Peter Principato bere ordezkari ohiengandik banandu zen; azken hau ere Cregger-en ordezkaria zen, enkantea galdu ondoren.